Bukkums goat d’r al 40 joar veur - Foto: eigen geleverde foto
Foto: eigen geleverde foto

Bukkums goat d’r al 40 joar veur

DALSEN – Wij heb’t hier al vaker e zegt: iens ’n bukkum, altied ’n bukkum. Maar det is makkelijker e zegt dan e doane. Veural in de begintied leek ’t soms nenn’s op. Zie deed’n maar wat en doardeur is’t op die eerste Oldjoarsdaag’n in de joar’n zeumtig wel’s onneudig late en ruig e wudd’n. Dat’t toch nog tut dit veur onmeuglich e hoald’n jubileum e komm’n is , mut veural toe eschreem’n wudd’n an’t enthousiasme woarmee ok de nije lichting bukkums ’t noa ’n joar of tiene oppakk’n. Toen het in De Trefkoele ienmoal ’n bettie op poot’n stund, was’t eigenlijk ’n geloop’n koers: de jeugdbukkums konn’n zich doar volop uutlèm’n en de eerste lichting werd steeds meer publiek en kreeg’n boamdien hun daybeforebukkumuutstAPPie.

Ondertussen bint ze dan gemiddeld al met zo’n vieftig man op de fietse tut in de verre  umgeving (Madrid, Engeland, Hoonhörst, um maar wat te nuum’n…) op stap.. Het aantal lekke baand’n in al die joar’n is op de vingers van ien haand te tell’n, um nog maar te zwieg’n van de neudige valpartijen en andere crashes, maar det stekt hele moal niet zo slecht of bij wa’j soms bij de profs op de tillevisie ziet. Ofklopp’n, maar tut nu toe hebt ze zich allemoal, d’iene wat meer an e slaag’n dan de aand’r, toch weer vrog of late oaver de brugge in veiligheid e bracht.

CICHOREI
Begin november wa’w toevallig nog èm’n weer in de buurte. Net toene wij vanuut de Bukkumbuurte richting Waterfront ( want det kan teeg’nwoordig..) reed’n, zaag’n wij bij de voormalige cichoreifabriek ’n stuk of wat van die gelige sloopmachines stoan. Ie schrikt dan toch wel èm’n, zie zult toch niet..??? Gelukkig ha’w niet völle tied um d’r bij stille te stoan. Wij moss’n op tied in Wijthmen wè’n veur’n pöttie golf.

En o’jt noe  gleuft of niet, toe’w doar ienmoal an de gang waar’n, kwam d’r iniens enn’s vandan ’n steeds sterkere cichoreigeur opzett’n. De laatste teek’ns van lèm’n van onze fabriek of is d’r inmiddels ok in Zwolle op’t  industrieterrein zoiets? Buisman uut Zwartsluus leek ons toch wel’n bettie verre weg….Hoe dan ok, het waar’n veur ons indrukwekkende herinneringen an de tied, dat de Dalfser Cichoreifabriek nog in de lucht was.
Ondertussen he’w begrepp’n en e zeen, datte e toch niet helemoal e sloopt is. ’n Groot muurgedeelte giet nog’n belangrijke rolle spöll’n bij de horeca-invulling van het Waterfront, wat wi’j nog meer. En noe’w toch  doar weer an e landt bint, wij mut ondertussen eerlijk toegeem’n dat ’t zo langzamerhand toch enn’s op begint te liek’n. Of det noe noar ieders smaak is, doar ku’jt nog joar’n oaver hebb’n. Teeg’n de tied da’w de  bukkums 50 joar on the road hebt, weete wij misschien niet anders meer en denke wij met mekare, woarumme bint ze niet völle eerder op dit idee e komm’n….
Verder was d’r dit joar weer van alles aan de hand in Dalsen. Te völle um hier uutgebreid op in te goan. Dat wij nu eindelijk ‘s ’n stuk of wat bekers e w(v)un’n heb t is volkomm’n T(e)recht. Vrogger toe’w bij de  Heidepette vakantiewerk deed’n, heb wij ok flink in die buurte in de grond an’t krabb’n e west, maar toen gunk’t nog um’t onkruud. A’w det e weet’n hadd’n….

En dan mu’w hier toch ok nog èm’n ’n groot compliment maak’n an de Schrievers van Dalfsennet.nl. Grote klasse en mooi det wij doar met aaklig völle plezier in zit rond te neuz’n oft noe um foto’s of um nij’s giet, altied wel iets interessants.
Woar wij ons ok erg op verheugd, bint de nije camera’s bij’t station. Eindelijk bewegende beelden van die Bukkummeute die doar rond’n uur of iene op de fietse stapt veur de Umloop van’t Bukkumvolk. ’t Schient dat  d’r vanwege ’t jubileum ok nog wat speciaals stiet te gebeuren..komt det zien..en/of kiek veurof veural op ons weer flink uutgebreide webblad: Bukkum.nl dus.

Namens de noordelijke bukkums,
Paul Jacobs

Foto's 4
Bukkums goat d’r al 40 joar veur - Foto: eigen geleverde foto
Foto: eigen geleverde foto
Bukkums goat d’r al 40 joar veur - Foto: eigen geleverde foto
Foto: eigen geleverde foto
Bukkums goat d’r al 40 joar veur - Foto: eigen geleverde foto
Foto: eigen geleverde foto
Artikel delen: