Ie kunt zien en mangs ok vuuln - Foto: Ton S
Foto: Ton S

Ie kunt zien en mangs ok vuuln

LEMELERVELD – Assie un afrastering hebt die nens meer op lek, muj dur wat an doen. Hier wast un afrastering met linten en un de zoveul ruumte un teerpaol. Die paoln ston hier en daor a kats schief en de ruumte dertussen was mangs veuls te groot. Ik denke detter wel wat paoln tussen uut waarn.

 

Noe met un vracht nieuwe paoln probeern um de afrastering better te maakn, zodet de peerden die der loopt dur minder commentaar over hebt en dur met bewondering nor kunt kiekn. Ien van de linten kon mooi over de afstand espan wurn, zodei de nieuwe paoln mooi op un reigie kriegt. Ut waarn paoln van bienao 3 meter en met un grondbore kuj un meter diepe boorn. Assie dur dan un paol in doet, vindt de peerden ut gien kiek zoverre boom de grond. Um de grondbore noe dieper te laotn boorn, muj met de schuppe un bonke grond um ut gat weghaaln. Um noe over de hele veertig meter bie al die paoln grond weg te spitn zodei dieper kunt boorn kan zat.

Mar assie un schovel bie oe hebt um de paoln en ut andere gereedschap dei neudig hebt met te nem, kuj die mooi gebruukn um op de plaaste waor de paoln komt un bonke grond weg te schoeven. Zo kuj ut gat dieper boorn en kump de paol dan dieper in de grond. Ie kunt dan overlegn met de peerden of ut dur zo better is um an te zien. As die peerden dur nao un parteie bekvechten, eindeluk vindt det noe is um an te kiekn, kuj de linten der ok anmaakn en mutter nog stroom op. Veur die stroom mutter un kabel onder de grond deur espit wurn van de iene kante vant hekke nor de andere kante waor al stroom op de afrastering zit. Un kerl die rap de stroom wol ansluutn dacht eem niet goed nao en kreeg toen un laoge stroom deur de baste en wus toen detter nog stroom opstond wat ankoppeln meuiluk mak.

Toch weer eleert deu stroom niet ziet mar wel veult.

Ton

Artikel delen: