Braand-tonne-gie  (Nedersaksisch) - Foto: Gruune Jopie
Foto: Gruune Jopie

Braand-tonne-gie (Nedersaksisch)

DALFSEN  – Das toch wel makkelijk, al die sloten en wadi’s bej de nejbouw. Ast dan een bettie ewejt hef, blif al de verpakkingstroep mooi in de sloot liggn. Dr wurd nogal een bettie verpakkingsmateriaal gebruukt in de bouw. Elke bult steenn, elk lattie en kozientie wurd apart aneleverd en dus apart verpakt.

Vrögger had die bouwvakker sien braandtonnegie mar det mag nie meer. Noe gooit ze ut an de kante en aj dan een vosse wind hebt, ligt bej de buurn. Doarumme, denk ik dan, al die slootn en wadi’s, mooi makkelijk, heit gelieke bej menare liggn. Ien keer in de wekke sietie een bouwvakker opruumn. Giet alle troep in een container en wurd ut af evoert noar een verbrandingsoven. Een hele grote braandtonne. De rook giet dezelfde lucht in as de rook van al die kleine braandtonnegies.
Ut genot van det braandtonnegie hef die bouwvakker ok nie meer want vuurtie stokkn is mieters mooi werk. Is waarschijnlijk nie zo gezond, veur oezelf en veur een aander, doarumme mag t nie meer.

Ja, kent de jeugd nie meer, een old eulievat moss ie koopn. Met de slieptolle een paar gaatn dr onderin maakn veur de luchttoevoer en ie haadn een perfecte braandtonne die een paar joar met ging. Zo’n tonne roestn wel binnen een paar joar vot want vuur maakn det iezer slap.

Groetn Gruune Jopie

Artikel delen:
Foto 1