Bij de galg rechtsof. Wij konn’n onze oog’n niet gleum’n! Aj zoiets in de Dalser lest, dan gleuf ie toch niet wa’j ziet. Galgenhumor! Wilt ze bij de noordelijke entree van Dalfsen ’n kunstwerk det te maak’n hef met galgen. Wij dachten dat det kruuspunt al sinds bukkumheugenis ‘Driessen’ heetten.

Altied weer luu die’t better weet en dan zo iets verzint! De eerste verkeerslichten binnen de territoriale gronden van het dorp Dalfsen of liever nog: Gerner en dan goat ze in ien keer op die toer. Doar durft toch gien mense meer langs. Gien wonder dat d’r ’n storm van protest op stekt. En dan hebt ze kort doarveur ok nog ’n gepland kunstwerk bij die nieuwe wiek Gerner of e bloaz’n. ’n Rotonde is a meer dan genog  kunst. Ie valt van de iene in de aandere verbazing. Wij komt hier dit joar niet iens an de Vechte en’t Waterfront toe! Watt’n opwinding alleen al an en umme de Koestege!  En wat dach ie van det geëmmer oaver de deurgang bij de Melkfabriek, deur Troanendal. Wilt ze doar soms ok alle historische details um zepe helpen.? Sorry heur, da’w zo gallig met de deure in huus valt, maar ie mut ok kunnen begriep’n da’w, toen wij doar lucht van kreeg’n, eerst dachten:”Zol d’r toch nog ergens aans ok’n Dalfsen we’n?” Wij meen’n toch te weet’n dat er op de hele wereld maar ien Dalfsen is en sinds wij internet hebt weete wij det wel heel zeker

Noe is Dalfsen natuurlijk wel’n stuk groter e wudd’n. Zolt doar met te maak’n kunn’n hebb’n!? Wij wilt d’r dit joar toch’s extra op lette’n a’w van die kaante kompt.

Zeg maar van de kaante van Nijluus’n. Dalfsen is veur ons ‘n stuk dichter bij e komm’n. Aj alleen al die Dedemsweg en de Jachtlusterallee telt, giet det toch al gauw um’n kilometer of tiene. Doar mu’w toch maar’s wat met doen (kunstwerk!?).PRIES Wij bint benij’d woar de fietstocht dit joar hen giet. D’r is weer ’n heleboel uut te legg’n ( zeg maar de Nije Uutleg), want hoe d’r in Dalfsen soms met kunst umme e sprung’n wud, doar ku’w oe toch al gauw ’n hele website oaver vol schriem’n. ’t Is al een wonder da’t Bukkummonument d’r nog stiet, want det hef tussentieds ok al eens tuss’n ’t puin op de gemeentelijke opslagplaatse e leeg’n. En wat d’r met de verhuuzing van’t oalde noar’t nije gemeentehuus allemoal mis e goane is as’t op kunst ankump… Doar trekt elke verzekeringsmaatschappij wit van weg en die luu hebt toch wel ’t ien en aander met e maakt!

Zo’n kunstcommissie mut toch ok ’t hen en weer krieg’n. Magt ze zo en zo völle bedenk’n en uutgeem’n en dan wud d’r net zo makkelijk weer ding’n of e bloaz’n. Och ’t is maar kunst, doar kieke wij ok niet meer van op!

’t Schient zelfs da’t  Bukkumbestuur  noe ok’n nije (culturelle) pries hef in e stelt um an disse rare ontwikkelingen poal en perk te stellen.

’t Fijne doaroaver en ok verdere informatie ku’j op bukkum.nl vinden.

Hoe dan ok, wij trekt d’r op de Day before Bukkum weer em’n vrolijk op uut vanof Station en zult dan nog iens ien keer goed kiek’n hoe Dalfsen d’r van die kaante uut zöt, want met die grote Waterfrontplann’n kan’t d’r voll’nd joar um disse tied wel ’s heel aans uut zien. Misschien mu’w dan ok doar wel veur verkeerslichten wachten!Naam’ns de noordelijke bukkums,

Paul Jacobs