Wie hebt dit noajoar à van alles ehad, een hoop wind, al een mooi wintertie, zels met snee, mar veural een bulte rèèngen. Doar wönnen mie köttens een mooi sprekwoord oaver an’ereikt:

“As’t tunnegie vol is, kömp dr vanzelf een deksel op.” Det wil zovölle zengen as, noa een rèèngentied begint ut vanzelf te vriezen. Die olde sprekwoorden zat vaeke een hoop woarheid en wiesheid in. Zo hieten een köt piepie vrogger een neuswärmertie, doarumme vunne wie det pas ok zo gek. ’t Was mooi vorstig weer, doar stund dr iene in de veurtuun, die zo’n piepie tussen de lippen had hangen, en die zèè det e èmen een frisse neuze wol haelen. Det was dus à net zo’n zökke as Gait Jan. Indertied mos ik um een keer äns veur hemmen, ik leupe bie um binnen, zèèd zien vrouwe, mu’j Gait Jan hemmen, die is bie de värkens in ’t hok, à’j dr hen goat, ’t is denne met de pette op. Veurige wekke was ’t glad mis met um, Hij had mie toch de griep, niet te krap. Gelukkig is e noe weer an de betterende hand. Mar ik geve oe op een blank briefie det e vollend joar wel de griepspuite haelt. Woarumme ok niet, as ’t niet hulp zol de menister dr vaste niet zovölle geld veur uuttrekken. Boamendien stelt det spuitie toch ok niks veur, iej könt dr hoaste op een draf bielangs lopen. En een mèènse is nooit te old umme zels deur schae en schaande wat te leren. Hoewel,…. ’t is net een Häddenbärger, een vel veur de kop as een bolle. Doar is mar ien ding det nooit veraandert, en det is det alles veraandert. Dè’s mar goed ok, aans wönnen ut mar een saaie boel. De mais is dr noe ok zo’n bettie of, de donkere dagen veur käst komt weer an en det hef toch ok weer zien bekoring, läkker bie de kachel, een mooi boek. Wie hebt oos vogelhuussie op ’t balkon weer in’ericht, en ’t was metiene al een kommen en goan van al die mooie veugelties, gewoon een lust umme noa te kieken. Woar òk ok altied met schik noa kieke: De berichies in de kraante! ’t Goeie ni’js dan wel te verstoan, en det is dr een hoop heur, à’j ’t mar wilt zien. Een veurbeeld, de Dalfser van 25 november: Inzaemeling Leger des Heils, Unicefkaeten te koop, Senioren Advies Team van de grond, bingo veur hätstichting, diploma’s veur de vri’jwillige brandweer, SOS-kinderdörpen, dienstverlening stiet centraal bie plannen veur oze ni’je gemeente met Ni’jluusen, bingo veur de Imminkhoeve, sprekbeurte oaver Unicef, gulle gaeven Diabetes, uutkering veur de minima. Kiek, van zuk soort berichies wö’k altied een bettie wärm van binnen. Wat doen veur een aander.

Geboren

.

Eerst lös van oen va,

dan lös van oen moe,

en dan bi’j dr an toe

oezelf te wèèn, maar:

Iej wilt ok weten

hoe värre kan’k goan,

woar kan’k nog net stoan,

met een rustig geweten.

Zo köt an die grens,

goa midden deur ’t lèmen.

Slip iej ok niet gauw èmen

blief iej gewoon een goed mens.

Doarveur bi’j toch hier,

doarveur bi’j toch geboren,

niet umme oe zelf te bekoren,

mar veur een Aanders plezier.