Dalfsen’s Plat: Allerhande.

Dalfsen’s Plat: Allerhande.

Disse keer is weer van alles wat, gien lank verhael mar gewoon wat snipsnodderi’jen. Umme te beginnen wò’k ut èmen hemmen oaver oze ni’je Brunawinkel. A’j zo binnen komt, dan blinkt ut oe allemoal toe van ni’jigheid. En mien vertrouwde copiéerapperaten stoat dr ok netties bie. Allenig à’k noe een pepier deur de millen mudde snien, mu’k eerst op de boek op de grond goan lingen. Mar dr is mie verzekerd, doar komt nog een paar töfelties tussen, woar det apperaat op kan stoan. Niks in de weg dus, ik hoape det ze dr een bult schik hebt met mekaere. En boeken en CD’s hebt ze dr bie de vleet, as ok van die aandere snipsnodderi’jchies.

Postkantoor: Bi’w kwiet! Doar hè’k noe meer as 60 joar de deure hoaste plat’elopen hoe vaeke zò’k doar binnen ewest wèèn, en noe mu’w ’t zonder doen, en ok nog weer an aandere luu wennen. Mar niet etreurd, bie Schuurman vin iej ut allemoal terugge, helemoal achterin, wat logisch is, zie wilt oe op de hen en terugweg verläkkeren met al die aandere mooie spullechies in de hoape dè’j doar ok wat van met nemt, zol ik ok edoane hemmen, zaeken bint zaeken. Allenig, zie mossen dr een bettie meer zitruumte hemmen veur à’j, wat zo of en toe ok veurkömp, is èmen wachen mut veur dè’j an de beurte bint. Mar woar òk nog ’t meeste bli’j met binne is dè’k niet in een invalidenkärrechie zitte. Herik mien tied, ik zol meestens niet iens weten hoe òk dr binnen mosse kommen. Een kladde auto’s op stroate, en de stoepe käts vol met fietsen, gien deurkommen an, en as ut dan toch gelukt is binnen te kommen. dan wödt ut laveren, een stellinkie zo, een bloempot doar, nog een huukie umme, en joa heur an de balie. Hé…..! Jonges, hoe mu’k noe zittend in mien kärrechie een handtekening zetten? Die balie kan’k nauwelijks oaverhèn kieken. Nee jonges, ik hoape echt dè’k nog een poossie met de stok voort kanne. En luu, à’j zelf is äns, woar dan ok,de fietse neer zet, wi’j dan ok is denken an luu in zo’n kärrechie; à vaste bedankt. Sunterkloas: Det is à weer een steuchie eleen, mar dè’k dr zo goed op stunne bie denne, det hà’k niet in de gaeten, zelfs speculaeshätties in de briemenbusse, joa, iej heurt ut goed hätties, dan mut e toch wè gek met oos wèèn. Bibliotheek: Zoaterdag 5 dec. hè’k stiekem èmen een kiekie enömmen in de bibliotheek, det pärsoneel is goed bie de tied heur, en altied in veur wat oarigs umme de boel antrekkelijk te hoalen, en veural dr op’ericht iederiene an ’t lèzen te kriengen, töt zels de peuterties an toe. Veur disse mönnen hadden ze Sunterkloas zelf uut’eneudigd umme die kleinchies wat veur te lèzen. Iej hadden die kindersnuties is mutten zien, zo as ze vol verwachting Sint an zaten te kieken, zels hanen vol peppernötten van de beide Pieten waeren nauwelijks in stoat de aandacht of te leiden, iej konnen echt zien, det die kinder gewend waeren umme te luusteren. Goed zo olders, taal is ien van de belangriekste dingen die’j een kind met könt gemen. Blief veurlèzen. ƒ 850.000,- Joa, det lèès iej goed, een veurdeeltie op de begroting van de gemeente. A’j noe is een oarig plännechie hebt, klopt rustig an bie de road, zie hebt doar ƒ450.000,- van toe’evoegd an de algemene resärve, kö’w met mekaere nog een oarige deure van löstrappen. Vallen en opstoan: Vanof vandaege is dr in ’t gemeentehuus de gelegenheid umme te heuren, te vuulen en te roeken oe’t met oezelf dr bi’jstiet, teminste à’j bie de olderen heurt, of bie de jongeren, want dr wödt verzöcht as olderen de kleinkinders met te nemmen, umme ok die veur strukelen te behoeden. Mar ok gewoon de vaa’s en moe’s maagt best is kommen kieken heur umme te zien wat dr an’edoan kan wönnen umme vallen te veurkommen. Käsdaangen: ’t Veurspel is à begunnen, hier een middächie, doar een öömpie, zingen, luusteren, spöllen en bie een mooi muziekie netuurlijk läkker etten. ’t Heurt dr allemoale bie.Een feest vol gezelligheid. A’w doarbie de heufdzaeke mar niet uut ut oge verliest: Hij is geboren, umme oos te redden, gien kleinigheid! Soms denk ik wei’s is dr nog redden an? Ut hölt wel in dè’w veraanderen mut, een bettie aandere mèènsen mut wönnen., wat minder met oos zelf bezig. Wie mut allemoale met Um ok een bettie Messias wönnen. Zo hier en doar wat terechte zetten, wat heel maeken, een scholderklöppie uutdelen, ieder op zien eingen plaasse. Prettige feestdaengen.

Artikel delen: