Vri’jdag 12 meert, was ’t zovärre: ” ’t Eerste Oaveriesselse Boekenbal.” Det was nog is de muuite weerd. Ik heuren ien van oze schrievers, den ok in den Haag ewest was, zengen det det ut niet halen bie dissen oamd. Hoe kan ’t ok aans, De boel wönnen an mekare eproat deur Thea Kroese, van RTV-Oost, die ok völle det kokprogramma dut met al die olde kössies as kruudmoes, sloat met papnat en det soort dingen. Aranka Meierink vuulen wat schrievers an de taand, zonder det ze een tandartsendiploma hef giet haar det toch händig of. Anne van der Meiden, Jaap Scholten, Theo Vossebeld, Riek van der Wulp met haar Vuurteurentie, Harry Velderman en Gerrit Kraa mossen dr an geleumen. Nou, as die de mond lös doet hoeve wie oos niet te schamen, op Jaap noa, gien woord Japans bie. En dan Erik Dam, een klasse appät, zo as die oos allemoale streektaalvässies leut heuren, een heleboel uut eingen kökker. Umme 21 uur kwamp dan de grote klapper: Oze plaatsgenoot, de gedeputeerde Jan Kristen presenteren ut eerst nummer van ut ni’je gloepens mooie tiedschrift “VERDAN”. Hij beud det blad an, in onvervalst Twents. Ien van oze Oaveriesselse twiede kamerleden, Ank Bijleveld moch ut blad uut de hanen van Jan annemmen. Goed zo Jan, hädstikke mooi esprökken. Die luu van studio zeumen hebt zich ok mirakels uut’esloofd, umme zo as Harry Velderman zo mooi zengen kan, dr een wärkelijk ” Glossy Magazin” van te maken, wat een opmaak. Ok de schrievers, en de redaktie hebt wel een scholderklöppie ( à’j niet te häd sloat) verdiend, iej zollen dr stille van wönnen. As jullie, zo as echte Dalfsenaren betaamt, allemoale op 29 meert, op de instoefoamd van de Historische Kring Dalfsen in Pniël komt, dan kö’j det blad bie mie an de kroame wel inkieken en bestellen. Doen! Iej zölt dr gien spiet van hemmen. Doar stiet wärkelijk van alles in, mooie vroaggesprekkies, pracht verhalen, gedichten, een artikeltie van Jan Kristen een stukkie oaver de Horte enz. Allemoal verlucht met de mooiste platies die’j oe mar denken könt. Det boekenbal gunk uut van de Schrieversbond Oaveriessel, ut Van Deinse Instituut, De IJsselacademie en de Overijsselse Bibliotheek Dienst, die ok de verantwoording van det blad op de scholders hebt enömmen. Noa 12 kömp 13 meert, ok weer zo’n dag umme niet gauw weer te vergetten. Echt, de Lente was lös’ebästen. Ik mosse nog een paar mappen met pepieren noar ’n Aalshöst brengen. Samen met de vrouwe hè’k doar een heerlijk fietstöchie van emäkt, de bossen begönnen weer läkker te roeken, ok al wönnen die lucht zo hier en doar oaverheersd deur boeren-onjeklonje. En de vogels, wie hadden de hele weg een gratis concert. Ok boffen veur de Dalfser middenstand, die een extra feessie had in’elast met zoaterdag-koopoamd töt 9 uur. Op de terrässies deunen ze ok à weer goeie zaken, en: Doar was heel völle te doen, mooie muziek, olderwetse klompendansen, en een heus kenon. Noe kan’k mie veurstellen dedde wie vrogger 30, 80 en 100-joarige oorloongen ehad hebt, zie hadden veur elk schot een ketier neudig. En dan was elk schot nog gien äntvogel, mar’t klunk wè mooi gloepens häd. Denk iej dr an dè’j zoaterdagoamd de tied verzet? Aans zit iej zundag zo allenig in de kärke.