Ik hebbe niet graag brommen, disse wekke dus rustig an. Veurige wekke bin’k eingenlijk mien buukie te buten egoan. Wie hebt of’esprökken det mien stukkies zo ongeveer 420 woorden maagt wean, en toen waren ut dr 475 en ik was nog lange niet uut’eproat. Ik hadde nog willen vertellen van den olden den mie op de märkt anheult, umme te verklappen det hij die opa was, woarvan det deerntie op schoele zea, dettte nog liever had det de Dalfser toren umme veult dan det ze zien borrel umme stoten. Ik wachen dr al op dette mie uut zol neudigen umme dr samen ans iene op te nemmen, mar det veult vies teengen. Ik hadde ok gien plekke meer umme te schriemen det ut pluspunt verhuusd is en det die luu van det welwean veur olderen dr noe zo mooi bi’j zit. Det zeg ik dan noe mar eamen, want van die luu wi’k helemoal niet graag brommen hemmen, want iej weet mar nooit hoe o’j die luu nog is neudig könt wean, ik bin per slot van rekkening ok niet meer ien van de jongsten. Dus meansen asnog gefilliciteerd en dè’j doar mar met een hoop wille oen wärk maagt doen. Pas ok weer etten rond’ebracht veur “Töfeltie dekt oe.” Weet iej wè det det gewoon puur genieten is. De meansen bint allemoal zo bli’j en goed te passe, soms krie’j zels nog een dikke repe sukela toe. Och, alle vri’jwilligerswärk is mooi umme te doen. Wat kan dr een meanse noe bli’jer maken, as det e een aander bli’j mäkt, en vri’jwilligers komt ze nog ait teköt, dus niet langer wachen mar oe eamen äns opgemen, al zol ’t ok bie de kärke wean. Wà’k ok nog op mien kladbriefies hadde stoan, det waren de verkiezingen, die’w köttens ehad hebt. Iej könt ut geleumen of niet, mar ik wazze nummer iene, joa niet van die eközen wönnen( gelukkig niet, ik hebbe al zat an de kop) mar, die keus. Ik hebbe mien stemme al uut ebracht in Rosengaarde umme 7.58 uur, en toch is e geldig verkloard. Ik wol de verkiezingen niet beïnvloeden, mar noe ze achter de rugge bint kan’k dr gerust oaver proaten, ik hebbe de zoaterdag dr veur zelf ok ebromd, en niet zo’n bettie, op de luu van ’t CDA. Doar stund dr nota bene iene, toen e bezig was zielties te winnen op ’t kärkplein, doodgemoedereerd met een segrette in de snufferd den sufferd. Hij stund dr wel een bettie snotterig bi’j toen ik um dr op weze, en heult um rap op de rugge, mar achter um leupen ok meansen, det kömp wè meer veur à’j midden op een plein stoat. Denk dr umme männegie:”Slecht veurbeeld dut slecht volgen.” En toch hè’k op zien peti’je estemd ’t is namelijk ok de miente. Denne van knoldert had op de gruunen estemd, umme det die de auto op ’t platteland goedkoop wilt hoalen. Ik hebbe eleazen det in de plaassen woar ’t CDA ut grootste is de gemeentelijke belastingen ut leegste bint. Zö’j goed oppassen met mekare? Töt de vollende wekke dan mar weer. 420 woorden, zo!