Dalfsen’s Plat: Bukken

Dalfsen’s Plat: Bukken

Wie hadden hier vrogger, en dan proat ik oaver een kleine 50 joar eleen, een old vrouwgie. Die zea; te passe en te onpasse:”Bukken mu’w allemoal leren.” Nou, in de letterlijke betekenisse heb ik ut ok weer of’eleerd, ik kan met gien meansen meugelijkheid mien eingen veters strikken, en as äns een briefie van honderd op de grond lig, dan zet ik dr de voet op en wache töt dr iene in de buurte is die um veur mie op kan rapen. Mar vädder zit dr netuurlijk een hoop diepe woarheid in. En alleman hef dr vake wel oarig muuite met. ’t Valt ok niet mee umme de minste te wean. An de aandere kaante bint dr ok vake een hoop mooie dingen die’j wel is bereiken wollen mar woar à’j een hoop muuite veur mut doen umme ’t zo värre te kriengen, dan zegge wie ok: “Iej mut oe wel diepe bukken umme die bluumpies te plukken.” Mar iej hebt ok luu, die weet van bukken nog buungen, die goat gebukt onder een hele bult eingenzinnigheid. Dè’s ien van de ärgste ziektes die oe treffen kan. A’j doar met behebt bint, dan giet oe alleman uut de weg. Hè’j det ok eleazen, van Oldejoarsoamd 8 uur töt Ni’jjoars’s möns 8 uur kö’j niet uut Dalfsen vut met de trein. “t Hele stukkie hef te maken met ut millenniumprobleem, en helemoal an ’t ende van ’t stukkie stiet dan doodgemoedereerd, det det met iedere joarwisseling ut geval is. Ok leazen ik in de kraante det dr een ni’je zendmast veur vechtdal FM is op’ericht. Kö’j mie ’s Zundes met de middag nog better heuren veur ut programma dialect in ’t Vechtdal. Iej weet det toch met mekare nog wel iedere zundagmiddag um twaalf uur, eerst ut ni’js en dan Aalt Westerman, Luuks Kappert en Henk uut de Zandbak, 101.5 op de kabel en 105.1 op FM. Wie zollen dr eingenlijk best nog iene bie können gebruken die ok is een weurtie sprekken wil, of wat veurleazen. Hè’j Denne van Knoldert disse wekke ok eleazen in ’t weekblad veur Salland oaver andelen en belengen. Ik komme an delen agis niet toe, en van belengen heb ik gien keze egetten. Mar treust oe mar jonges, ’t geluk is met de dommen, det kö’j zien an hun riekdommen. En; oen loon könt ze pas bevriezen as det bie de nullijn kömp. Ik binne ok met besnuuiïngen bezig, de droeve en de bessen hebt al een beurte ehad. Mar alle gekheid op een stökkie, Meert de dialectmoand is weer veurbie, iej maagt dr noe zo noe en dan wei’s weer een weurdtie uut de standaardtaal tussen deur gooien as det zo is te passe kömp. Mar dan wè zuver hen, niet van det domme butenlandse gemekker dr tussen deur. Een wörkshop is gewoon een wärkwinkel, en as ik mien kökken goa revitaliseren geef ik um gewoon een opknapbeurte. En: ik wil de gemeenteroad best is een paar dialectlessen gemen veur vollend joar meert, hoewel ze ok wè dialect onder de leden hebt, en det is better as ien of aandere ziekte.

Artikel delen: