Gait Jan zeg altied, klagen maag ik niet, en pochen wil ik niet. Mar ditmoal wil ik wel is pochen! Pochen op Dalfsen, wat hebbe wie hier de boel toch veur mekare. Met det ofval beveurbeeld, körken, kö’j hier inleaveren bie de schoemakers, wödt hergebruukt. Löge blikkies, kroonkörken, schroemen spiekers, joa alle old iezer en blik könne wie zo kwiet bie ’t Beatrixgebouw. Lompen en old papier, iej könt het hoaste zo gek niet bedenken, mar oaveral hebt ze hier een bestemming veur, zelfs veur alluminium hebt ze bie ’t Beatrixgebouw een appätte bak stoan. Heb iej is een apparaat, of een stoel of banke die as iej kwiet wilt belt ze mar op zie haalt ze vake nog op ok. As d’r een bettie an mankeert, zie maakt het weer kloar en könt veur een paar cent een aander weer plezieren. Klasse gewoon! As ik bie mien kinders komme, en die woont hoaste allemoal in grotere plaassen azze wie, dan stoat ze met de oren te klapperen, een heleboel van die dingen; nooit van eheurd! Mooi, det mien grieze ofvalbak hoaste nooit an de weg hoeft, ik hoale d’r gewoon geld an oaver.

En dan, oze verenigingen, völs te völle umme op te nuumen, die maagt d’r toch ok wean, die maakt en hoalt oos dörp leafbaar, zoas pas de Oranjevereniging weer, wat een organisatie. Jonges, en meissies ok heur, goed edoan, bedankt, veural die fietsende muziekmakers doar hef alleman toch zo van genötten.! De opkomst bie de aubade veult mie trouwens een bettie teengen bie veurig joar vergelekken. Mar ik dreume al een bettie oaver vollend joar. Joa, vollend joar dan kömp det natuurlijk helemoal goed, 2000! Dan hef de muziek honderd joar bestoan, en giet ’s möns veur de aubade alle schoelen bie langs en haalt doar de wichter op, alle olders goat natuurlijk ok met. Det kan een riege wönnen; dan stiet d’r vaste nog meer volk an de brugge as met Sunterkloas. En dan de optocht, zo dreum ik voort. Natuurlijk dut de muziek met, en hoe! Doar zölle wie nog versteld van stoan. Alle schoelen, en teminste die ’t 75 joarig bestoan viert goat gangs, en de iene buurte wil niet onder doen veur de aandere. Al die verenigingen loat mie ok niet in de kolde stoan, die begint disse wekke ok al met plannen maken, besteld mar vaste een paar muziekgezelschappen extra. Woar as ik ok vaste op rekkene is een waangen van Hörstel. 55 joar verzoening met de duutsers , det thema veur 4 en 5 mei was toch van ’t joar:” Vri’jheid maak iej met mekare!” Dus mudde wie toch ok weer samen feest können vieren. En natuurlijk doet de luu uut Hörstel dan 4 mei ok met in oze herdenkingsdienst, ’t zal toch niet allenig een dreum wean?

Ik vertelle jullie disse dreum noe al mar vaste, dan könt jullie metiene beginnen, de tied giet hädder as dè’j denkt. Een dreum? De grootste optocht van noa de oorlog? Nee toch!!!!