Disse keer wol ik is iets ter toafel brengen, ik wolle ’t niet langer onder stoelen of banken stekken. Ik hoape wel dè’j goed luustert, ik wille namelijk niet graag allenig veur stoelen en banken stoan te proaten. Iets aans is, ik wol wè graag det wat ik jullie noe allemoal vertelle an disse toafel blif. Doarumme vertel ik ut oe ok achter de banke. Doar giet e dan; ik hoale van een rieke toafel, dan kan ik um ok nog best taaien al wödt ik dan ok al een däggie older. Ik hoale ok van een köt toafelgebed en een lang stuk wost. Niet boeren heur onder of noa ’t etten, dan zegge wie geef die boer een stoel, dan kan die boer ok zitten. Echt goed toafelen is gewoon een feest, doarumme hoale wie ok beveurbeeld met Käsoamd en Oldejoarsoamd graag töfeltiesoamd, dan stek ik gewoon de bienen onder eigen toafel. De bienen onder andermans toafel stekken, det lig mie niet zo ärg, ik blieve liever zelf baas. Deur de bank genömmen zit jongeluu die een bettie zelfstandig bint ok niet op de lange banke, die hebt in de kötste keren een vri’jer. Mar à’j een krukke bint, dan zegt ze van oe de iene krukke zit op de andere krukke. Ik zitte gelukkig ok niet an de gruune toafel, want det is tegenswoordig ok gien gräppie, wat zeg ik; ’t is bärre muuilijk umme as bestuurder ’t iederiene noa ’t zin te doen. En à’j det wärk niet goed doet, dan zö’j doar niet lange banken. Doar mag ok niks onder de toafel emoffeld wönnen, nee alles mut gewoon boamen toafel kommen. As ’t toch een moal mis giet in zo’n bestuur van gemeente of regering, dan mut de stoelendans van ni’js beginnen. Mar hier in Dalfsen kömp zoiets niet veur oze road heurt gewoon bie mekare as de stoel bie de toafel, zo’n hecht stellegie is det. A’j hier ienmoal in de road zit, dan is oen bedtie espreid, dan lig iej zogezegd in een wärm bedde. Zie probeert echt niet de poten onder andermans stoel weg te zagen. Alles kan ’t daglicht velen, zie hebt as ’t ware de lampe lieke boamen de toafel hangen. Woar ò’j wel veur op mut passen is, dè’j niet te völle op oe proatstoel goat zitten, want dan kon die proatstoel wel is een schupstoel wönnen. Ok veural niet met de voeste op toafel sloan, mar een slecht plan gewoon van de toafel veagen. A’j äns goed van oavertuugd bint mu’j oe ok vaste niet van de stoel of , of onder de toafel loaten proaten, ok niet de stoel onder ’t gat weg loaten trekken. Luu, as läste, loat oe niet tussen twie stoelen vallen, en goat ok niet tussen twie stoelen in de asse zitten. Blief kwiek en gooit oen hele hebben en hoalen rustig bie mie op toafel. Komt bie mie zitten, dan drinke wie d’r samen iene op, mar onder de toafel drinken, det red iej niet met mie. Det waren noe disse wekke oze toafelmenieren.