Dalfsen’s Plat: Regeren is veuruutkieken.

Dalfsen’s Plat: Regeren is veuruutkieken.

Köttens kwaam ik Lammert tegen bie de supermärkt, hij had de halve kärre vol droeven. Wat wi’j toch met zovölle van die dingen? Vreug ik um. Nou, det zà’k oe dan is rap uut deduukies doen. Ik hebbe een droevestruke an ’t huus, en alle joar is ’t weer hulen met de pette op, weer gien droeven, en de buren mar lachen. Lammert as wiengaardenier, gien knippe veur de neuze weerd. En noe zà’k ze dit joar is veur wean, ik goa temee nog eamen bie de doe ut zelver an, een bos droad halen, en dan knup ik disse trossen vanmiddag in mien droevenstruke, zà’k ze is wat loaten zien vanoamd as ze bie mie komt te barbecuppen. Kiek, det nuum ik noe een veuruutziende blik.

Met det Lammert deurlöp, loop ik Hein tegen de botten. Ok zo’n ampät geval, hij mos van de dokter ofvallen, en; vol trots melden de den mönnen det hij de veurige dag noar de weagbrugge ewest was en al 2½ kg kwiet was, ik goa noe vaste noar de kleermaker umme wat nauwere broeken te kopen. Ok hij mag van mie plaasse nemmen in de vollende regering, hij kik niet achterumme van wat ewest is, mar hij let op wat d’r stiet an te kommen. En noe heel wat aans, hoewel…………!Hebt jullie det ok ezien, oos poarse kammenet, een daggie uut, net azze wie vrogger met ’t schoelreissie? Joa echt woar, zie varen op ’t Sneeker meer met van die boten van de broene vloot, woar as ze vrogger ok al koeien in vervoeren, märken den verslaggeefster van ’t journaal zo fienties op. Wat det betreft is d’r dus niet völle veranderd. Wat wel veranderd is: De klerage, zie waren niet in ’t poars, mar zie hadden allemoal van die grune T-shirten an. Zol det wat können betekenen veur de toekomst? Wie weet! In ieder geval hebt ze de kans an ‘egrepen umme zich van ni’jsen op te laden, umme d’r sträks met frisse tegenzin weer olderwets tegen an te können goan, want veur dè’j ’t weet is ’t prinsiesdag. Wat zeg ik; vollende wekke dinsdag is ”t al weer zo wied. ’t Zal mi’j is verni’jen hoevölle of ze d’r oos biegeeft en hoevölle of ze oos ofpakt. Zol t een bettie in eamenwicht blieven ? Mar ien ding weet ik zeker, zie doet ut nooit goed, altied bint d’r wel meansen die zich ut haassie of ’t bukkie vuult. Soms bint ze ’t ok nog. Mar ok à’j d’r op veuruut goat, is d’r altied wel een puntie te vinnen woar ò’j oaver mopperen könt. A’j een hond wilt sloan, kö’j altied wel een stok vinnen.

Wat wel bärre mooi is; zie bint veur det uutie een steugie in Friesland ewest, det is toch een heel aander land as de rest van Nederland, hebt ze is an de lieve ondervunnen wat ut is umme butenlander, vremdeling te wean. Ik wedde det ze noe binnen de kötste keren die witten met open ärmen veurgoed binnenloat. Det ze in ’t vervolg de gastvri’jheid en gastvriendelijkheid weer hoge in hun vaandel schrieft, en umme de centen hoeft ze ’t ok niet te loaten, want die luu verdient hun kössie merakelste best. En ok dan nog, à’j de ciefers van oze ekenomie zo ziet, en dan ok nog rekkent wadde wie allemoal an luxe uutgeeft, dan kan d’r nog best een bettie of veur de luu uut wadde wie nuumt de dädde wereld, loate wie doar mar de eerste wereld van maken die oze hulpe neudig is.

Artikel delen: