Dalfsen’s Plat: De moane, schoele, opvoeden, metbrengen, metnemmen en det soort van dingen.

Dalfsen’s Plat: De moane, schoele, opvoeden, metbrengen, metnemmen en det soort van dingen.

De moane, Soms is e rond, vol nuumt ze det, soms is e half, of een sikkeltie. Een ander moal is e gangs met zien eerste ketier, hoewel de al miljioenen joaren old is, en as de moane an zien läste ketier bezig is dan hoap ik altied det ut niet zien läste ketier is. Ik zie de moane altied zo graag, umme det ik ut zo läkker vinne umme in de moaneschien te wandelen. Mar noe bin ik helemoal uut de zörgen wat det angiet. ’t Was 13 oktober ’s oams, ik zate achter mien computer; iniens: “Wat is det, heur ik meziek in de stroate?” Ik stekke de kop buten ’t raam en joa heur doar stiet Excelsior te bloazen. Ikke de stroate op, want wat appäts wi’k niet graag missen, as schriever van stukkies, columns nuumt ze det met een deftig woord, mu’j altied zörgen dè’j met de neppe veuran stoat En joa heur de slager is weer lös,en iej begriept ut al, noe hebbe wie altied moaneschien in de stroate. Wat hebt Moaneschien en Ekkel d’r een mooi spullegie van emäkt, echt de muuite weerd umme is eamen te bekieken, en d’r is wat van te pruven.

Ik bin ok weer een mönnen noar schoele ewest, dit keer noar de Emmerschoele, ik hebbe doar wat verhaalties verteld en de kinderen een bettie wegwies ehölpen in oze streektaal. Hanneke van Vilsteren van de Iesselacademie hef ok flink haar beste edoan de olders te oavertuugen hoe belangriek ut is as de kinders van ’t begin of an twietalig op evoed wördt. Ik hebbe doar ok een verhaaltie verteld oaver de rommel in ’t bos. En de meester en de juffrouwen op ’t härte ebunden det zie hun kinders dudelijk ut verschil bie mut brengen tussen metnemmen en metbrengen. Woarumme? Det zà’k oe eamen uut de dukies doen. Op iedere banke in oze mooie gemeente zit een bördtie met doarop de tekst.” Wilt u uw eigen rommel meenemen a.u.b.? Noe is ’t denk ik wel dudelijk. De meeste meansen verwärd metnemmen en metbrengen. Zie brengt de rommel met noar die banken toe en loat ze doar achter. Det was noe net gils niet de bedoeling van de gemeente.Doarumme een goeie road, à’j is weer de bos in goat, nemp dan een plastic buul met en stop doar oen rommel in. ’t Mooiste zol wean à’j ok nog hier en doar wat rommel oppakken en det ok met nammen, dan hadde wie oaver een steugie een hele mooie schone bos. Heb jullie wel is ezien det die mondstukken van cigeretten niet verrot? Niet meer veur de banke uuttrappen, brengt een blikken deusie as asbäkkie met, en nemt det weer mee terugge. Wat die kinders doar op die schoele anbelangt, bin ik doar niet bange meer veur, die hebt mie beloafd det ze met zollen wärken. En ik wil ze graag van disse plaasse nog eamen filleciteren. Van härte, det jullie zukke juffrouwen en zo’n meester hebt, opvoeders; klasse gewoon!! Oaver opvoeding esprökken. Nog een keer 13 oktober ’s möns half elf. D’r stopt een grote wagen op die driehoek veur de rabobank woar NP stiet. Doar stapt een kerel uut in zo’n blauw uniform, met allemoal van die witte tressen oaver de boek en de scholders, een hele hoge ome van de plietsie. Zo hoge det hij niet iens zelf ridt, mar een chauffeur hef. Hij giet eamen een bosschop doen en stapt dan weer in. Zol zo’n hoge ome van de plietsie zich misschien niet an de regels hoeven te hoalen; wat ik betwiefele, dan is ut opvoedkundig nog een hele slechte zake. Hoge bomen vangt völle wind.

Artikel delen: