’t Is al weer 15 december, nog tien dagen en wie hebt käsfeest, altied ien van de gezelligste feesten, liefst nog met een bettie snee ok, mar det weet ik niet of det d’r inzit. Det mu’j mar an die weerprofeten vroagen. Mar ok zonder det kan ut heel gezellig wean. Oaveral begint noe al de vieringen en wijdingen, zang en muziekoamden. Samen as vereniging bie mekare met mooie verhalen en gedichten en samen an toafel umme te etten. Kinders en kleinkinders op bezuuk, in de ri’je veur de kassa’s. De käsboom, lichies, ballen glitter en engelties, ’t is immers ’t feest van ’t licht. Mar, denk ok is eamen an al die luu, die d’r noe al as een bärg tegenop ziet. En dan ’t ende van ’t joar, ok al weer in zicht, eamen terugge kieken noar ’t veurbi’je joar, hoe is det ewest, en eh….wat wacht oos in ’t ni’je joar? Hoevölle kniept um noe al umme det ze narigheid in ’t verschiet ziet? Wat mut det wönnen?

Vandage wol ik det ok is eamen met jullie doen, eerst eamen terugge kieken hoe goed wie as Nederlanders eigenlijk allemoal wel eleafd hebt. Goat d’r mar is goed veur zitten en sloat oe mar vaste is flink op de böste. Nemt noe al die akties van ’t joar, veur de slachtoffers van de oorlog in Kosovo, veur de aardbevingsslachtoffers in Turkije, veur de watersnood in India, veur de waternood, ’t schelt mar ien lettertie, in midden Afrika, en weet ik wat nog meer. Wat hef det allemoal wel niet op ebracht, en det hebt ikke en ieje toch mar bie mekare ebracht, det is toch gewoon umme stille van te wönnen. En hebt doarumme de kelekten veur ’t rooie kruus, kanker, härt en nieren, de kinderpostzegels, ut leger des heils en goat zo nog mar een keer of 50 deur, minder op ebracht. Nee luu, sloat oe nog mar eamen weer op de böste, nee; det stiegt zelfs nog altied een bettie. Leazen ik mie toch dedde wie veur al det soort van dingen, oaver ’t hele joar genömmen mar liefst ƒ 700,00 per huusholdige uutgeeft. Goat d’r is anstoan, det kömp dus neer op; hoalt oe mar eamen goed vaste, op 3½ milliard per joar. ’t Is toch kassueel of niet dan.

En noe een aander rekkensummegie.

Sunterkloas kedogies 3½ milliard, kästkedogies noar schatting 2 milliard. De gemiddelde Nederlander kreeg mar veur ƒ 150,00 an verjoardagskedogies des 2¼ milliard . Vekantie mar ƒ1200,00 per huusholdige ofwel 6 milliard. Uutgoan, zoas uut etten, noar de bioscoop, theater, musea, pretparken, muziek enz. enz. schrik niet, mar doar geve wie gemiddeld mar ƒ50,00 in de wekke veur uut, des toch de muuite niet weerd umme te numen, mar zo’n 12½ milliard in ’t joar. Hoevärre bin ik noe? Nou tegenoaver die 3½ milliard veur oze noaste, mar een schijntie, mar ongeveer 8 moal zovölle! Echt woar, mar 26¼ milliard. Ik hebbe de rokeri’je en de drank, de koekies en ’t gebak, en wà’w nog meer te bietied opet, mar oaver eslagen, want det schient bie de eerste leavensbehoeften te heuren. Nee luu sloat oe nog mar is eamen goed op de böste, en loate wie sträks veural zörgen det met de käsdagen de kärken weer uutpuult, en de muren hoaste umme valt van oos zingen van vrede op aarde, want an die vrede hebbe wie dan toch mar mooi oos stientie bie edragen. Deur oos toedoen könt ze oaver de hele wereld noe läkker käsfeest vieren, ärmoe wördt näns meer eleen. En veuruutkieken? Det mag ok, wie bint d’r nog niet, mar met mekare kan d’r bässens völle, mar dan niet te völle de haand op de knippe.

Doarumme weans ik oe allemoal hele prettige feestdagen en betterschop, dè’j ’t kommende joar mar völle cheques uut maagt schrieven.