Joa luu, ut is noe ienmoal niet aans, iej zölt ut vandage mutten doen met olde kost. Niet zo mar een klikkie van gisteren, en ok niet een möaltie van de veurige wekke uut de diepvries, nee ut is dit keer völle, völle ärger. Ut stukkie dè’j noe zit of stoat of ligt te leazen det heb ik echt woar al eschreven in de veurige eeuw, niet te geleuven toch. Ik wil graag beginnen met oe allemoal een gezond en gelukkig ni’jjoar toe te wensen. Wie weet gien ien van allen wat ut oos brengen zal, en det is mar gelukkig ok. Wie hebt ok niks te kiezen, wie keuzen misschien toch de verkeerde dingen. Wie meansen weet meestentieds toch niet wat ut beste veur oos is, loate wie det dus mar gewoon an de grote baas oaver loaten. Ik wense jullie allemoale toe dè’j mar een hoop meansen umme oe hean maagt hebben die van oe hoalt, en wat nog belangrieker een hoop meansen woar as iej wat veur betekenen könt. Want ut stiet ok al hoaste 2000 joar in de biebel: “De liefde, det is ut alderbelangriekste.” Ik dreume nog wei’s van een tied det ik mie niet meer hoeve te schamen det ik geriffermeerd binne, dan dreum ik dedde wie allemoale noar ien en dezelde kärke goat, en dedde wie niet meer bezig bint op alle släkkies, veural bie een aander, zolt leggen. As ze mi’j dan ok vroagt, wat bi’j van oen geleuf, zeg ik ok niet det ik geriffermeerd binne, mar zeg ik gewoon det ik probere een bettie Christen te wean. Wie hebt allemoal samen ok mar iene God, en azze wie noe mar is op hoalt die veur oos eigen kärregie te spannen, dan binne wie al een heel ende op weg. Ok dreum ik van een wereld zonder oorlog en zonder honger, en van bestuurders op alle gebied die niet mar uren zit te vergaderen en te vitten op kleinigheden, en niet probeert mekare de vliegen of te vangen, mar op luu die knuppen deur weet te hakken, en wat wilt betekenen veur alle man, van wat veur kleur of ras of godsdienst ze ok maagt wean. De wereld is groot genogt, en d’r bint ok middelen zat umme iederiene ’t goed te loaten hebben, azze wie de boel mar wat better wussen te verdelen, en mar is opheulen met ikke, ikke, ikke!! As ut an mie lig, blief ik gewoon een bettie schrieven, mar zeker bin ik doar niet helemoal van. Dut mien computer ( rekkenblik) zegt ze in Zuud Afrika ut nog in 2000 of is e van old op ni’j uut mekare ebästen? Iej heurt zukke gekke dingen, ien ding treust mie, de regering hef een plekke kloar emäkt woar as ze alles met old en ni’j in de gaten hoalt, wie weet geeft ze ok een bettie acht op mien toestellegies. As mien spullegie ut vollende wekke toch niet meer doet, dan vroag ik an de burgermeester of ik een kellekte mage hoalen veur ni’j spul. Ik hebbe ok nog een ni’jgie veur jullie, ik bin disse moand veur ’t eerste de elektrische snelweg op’ereen. Sjonge wat giet det härd. As ik oaver de veerbaansweg met de auto noar Alkmaar rie, dan mu’k knap oppassen wil ik ut in twie uur doen, en noe; ik tikke een stukkie op mien mesjiene veur mien zunne doar en binnen 10 minuten lig d’r een antwoordbriefie bie mie op de toafel, ’t is toch kasjuweel. As jullie noe nog is een oarig berichie veur mie hebt, woar as iej oaver eschreven wilt hebben, dan stuur iej mie det mar per snelpost, de PTT is doar mar slakkenpost bie. En à’j nog effen wacht töt de vollende eeuw, dan hoef iej mar an mie te denken, en oen gedachten rolt hier uut de printer.