Dalfsen’s Plat: Van namen, auto’s en nog wat meer.

Dalfsen’s Plat: Van namen, auto’s en nog wat meer.

Een name, wat stelt det eigenlijk veur, Shakespeare had ut d’r ok al muuilijk met. Een name, eindelijk is dan de kogel deur de kärke, Ni’jlusen en Dalfsen wördt iene. Zie waren d’r agis gien pepperspray veur neudig umme Peper zovärre te kriegen. En de name bint ze ’t ok oaver iens ewörden. Ut is pesies zo uut-epakt as ik in mei 1999 in een radiopröatie al veurzegd hadde. De eerste lettergreep van Dalf-sen en de läste lettergreep van Ni’jlu-sen. 4 letters van Dalfsen en 3 van Ni’jlusen, det gif de verholdingen ok oarigies an weer. Bie de gehuggies umme Dalfsen hean, as Lemelerveld, Oldlusen en een Hoonhörst is dus Ni’jlusen bie-ekommen Zoas Aalt Westerman zo fienties opmärken Dalfsen krig sträks ontwikkelingshulp van Ni’jlusen, en det könne wie goed gebruken. Teminste azze wie Jan van Dalfsen maagt geleuven, dan mankeert ut oos in Dalfsen nog wel is an benul. Mar ok iederiene persoonlijk hef een name, al mag ut dan soms hoaste gien name hebben. Soms zeg een name een heleboel, veural bi’jnamen. Zegt ze beveurbeeld van oe det iej een pieneköttel bint, dan is det niet bedoeld as compelementie, en weet iederiene best det iej niet völle veur oen medemeanse oaver hebt, dan hè’j misschien al wel een dure vakantie eboekt, mar de helfte doarvan nog niet oaver-emäkt veur hulp an Mozambique. En, hoe wi’j graag det ze oe nuumt? Maak iej ut doar ok noar? Könt de luu det ok an oen dagelijkse bezigheden en proat märken? As det niet zo is, schrap zo’n name dan astoeblieft uut oen pesoonsbewies, iej weet allemoale wel wat ik bedoele, o-j noe Mohammedaan, Humanist, Christen of wat dan ok bint.

Bint jullie ok zo bli-j dè-j gien minister bint? Nou, ikke wel. Stel oe noe is effen veur; iej wilt een auto anschaffen en oen oge völt op een Jaguar van 400.000 gulden. Ofblieven, det mag niet, iej maagt niet hoger goan dan 102.000 gulden, schande nuum ik det, oe reinste krenteweageri’je. Nee heur, as ik een auto uutzuke maag ik ’t gelukkig nog helemoale zelf weten. Weet iej wat ok niet mag as minister? Oen eigen vrouwe metnemmen op een snuupreisie noar Amerika of China, en, o wee a’j niet zunig al oen briefies van oen etteri’jgies bewaart. Schande, ’t volk hef d’r toch niks met te maken woar as iej hun belastingcenten veur gebruukt? Of ut geld van oen gas- en electriciteitsrekkening. Doar maagt die bestuurders toch best golden handdrukken van uutdelen, ’t is toch, zo gauw a’j betaald hebt, oen geld niet meer. Nee, lang leave de privatisering! En ikke; ik wete ut noe heel zeker, det ik nooit minister of zoiets wörden wille.

6 Meert, eindelijk was ut dan zovärre, de schuppe de grond in umme de “Stroate” en de anliggende stukkies winkelgebied wat ogelijker en begoanbaarder te maken. Op ’t Kärkplein veur de Chinees is de anzet egeven.

En det zunig wean, det pieneköttelige? Gait Jan! Ok zo’n kniepstuver, zien katte was ziek ewörden, en hij mos d’r met noar de veeärts. De katte wörden weer goed kloar, mar noe had Gait Jan noast den katte ok nog een kater, de rekkening van de veeärts bedreug 125 gulden.

Artikel delen: