Licht? Duuster? Ik heure det wei-s van meansen. Soms kan ’t in ienen zo duuster wean. Dan is ’t net of dr näns meer licht te vinden is. Dan kan een meanse hoaste alles en iederiene wel haten. En dan iniens…Een spränkie, een vunkie, een haand op de scholder een ärm umme ’t lief. Zo leazen ik pas det Staring vrogger al schreef det duusternis allenig met licht te verdrieven is, en in ienen oadem zea de dr bie; haat allenig met liefde.
Zolle wie doarumme as meansen soms meestentieds twie haande ekregen hebben, iene umme noar links en iene umme noar rechts uut te stekken, te rekken, te strekken noar den aandern op an.
Bie de tied. In de Zwolse krante van 16 meert stund det dr an de Brinkweg een computerbedriefie zit. Ut college vindt det doar rap wat an gebeuren mut, det is woonbestemming stiet dr bie. Ikke den zelfden dag nog noar det bedriefie op an, ik hadde toch immers den moes kepot. Loat noe det bedriefie dr al twie moand weer vut wean. En de eigenaar; die moch dr niet wonnen hè’k mie loaten vertellen, dr zol atelierbestemming op liggen. Wie is dr hier noe zo bie de tied, oos college of denne van de krante?
Verrassing. Ik wörden ofgelopen wekke iniens verrast met een brief van Gait van ’t ärf, keurig in ’t AB-plat. Bedankt Gait, wat vin ik det een mooie uutdrukking. Gait leup met de vrouwe de brugge oaver umme samen een köppie koffie met iets dr bie te gebruken bie ’t olde station, wie ’t breed hef löt ’t breed hangen. Wie bint net goed en wel det huus oaver de brugge, met det koffiemelkvaantie veurbie, zo gunk e wieder, toene wie iniens zo mar midden in de stoepe een tegel tegenkwammen met een gebit dr in. Weet iej as kundige Dalfsenaar misschien wat det veurstelt? Ik hebbe um terugge eschreven det ik den tegel ok wei-s ezien hadde, mar det ik ok niet wusse of det noe een gräppie van ien of aanderen kunstenaar of kunstenmaker was, of det gewoon den tegelbakker bie ’t bakken oaver zien nekke egoan was. Ik hebbe um ok beloafd det ik ut an Jan Publiek, dus an oelu met mekare veur zolle leggen. Wie kan oos uut een dreum helpen? Doet mie eamen een briefie in de busse of bel mie eamen, ik zol ut op pries stellen as ik den besten Gait voort zolle können helpen. En onder an de rekkening van de tuunman, die mie de beazen esnuiuid hef, stund det ik dr best mest van een allesvretter bie moche streuien. Iets heel aans, wie o wie, hef dr Moespotten van mie eliend en nog niet weerumme ebracht? Meansen ik hoppe det dr nog völle meer meansen de moed op vat umme is wat in oze moedertaal te schrieven; muuilijk? Niks muuilijker as vrogger oen eerste liefdesbrief. Ik wache op oen briefies.Töt slot nog een gedichie.
A-j rieke könt wean met een bloeme in d’hof,
a-j geniet van een spöllend kind op en of,
a-j zunne en meansenwärmte könt waarderen,
bi-j gelukkieger as tien miljoeneren.