Dalfsen’s Plat: Meneer

Dalfsen’s Plat: Meneer

Meneer. Oaverkömp oe det ok wei-s? Zo iniens heel ärg verwonderd wean? Ik leupe köttens in de stroate toen ik heuren zeggen: “Dag meneer.” Ik keke in ’t ronde, en nog is in ’t ronde, mar ik zage allenig den kerel die dag zeggen en allemoal vrolluu lopen. Ikke op den keerl toe, hoe hè-k det noe met oe? Giet oen emancipatiegedrag noe al zovärre det iej tegen de vrolluu ok al meneer zegt? Hoe kom iej dr bie? Kree-k as antwoord, ik zeade oe goeiendag. Ik veule hoaste steil achteroaver. Ikke? Ikke? Meneer? Joa zeg den vent doar liek iej teminste meer op as op een voer heui. Umme op die stroate terugge te kommen, ik leupe doar umme det ik noar de bank wolle. Ik wolle wei-s ’t ien en aander opknappen an en umme ’t huus en det kost geld. Woar dach ik zo; kö-j dan better terechte as bie de bank. Doar zit zovölle reserves op. Let mai-s op met voetballen. Nou en van die reserves heb ik begrepen, lient de banken oe dan geld. Mar noe’k dr ewest binne bin’k dr wel achter. Ie-j kriegt zomar gien geld van die reserves, zie mut zovölle van oe weten, zie vroagt oe hoaste ’t hemd van ’t gat en à-j dan uuteindelijk bewezen hebt dè-j eigenlijk gien geld neudig bint, dan kö-j zo iniens een hele bonke geld lienen. Zekerheid veur alles. Zol ut sprekwoord doarumme luun: “Zo safe as de banke? ” Nee, dan die vogels. Die bouwt zo mar een huus. En ’t materiaal? Zie betaalt dr gien cent veur. Wie hebt achter ’t huus een schure, woar azze wie van boavenof op dale kiekt. Die schure hef een golfplatendak det vol-egruuid is met mos. Noe mu-j die liesters is zien. Bekken vol van det spul haalt ze dr of umme hun nest met te voeren. Tötdet ik veurige wekke de kraante leazen. Dr was dr weer is iene die zien wärkgever wol loaten opdreaien veur zien asbestlongen. Foj toch dach ik, stel oe is veur…. det schurendak van mie bint ok asbesteplaten. Stel oe is veur…. det die liesters mie sträkkies ok anklaagt. Ik hebbe op stob de dierenbeschärming ebeld. En noe stiet dr op hun anroan een bördtie op det dak. Asbestgevoar! Mos jätten op eigen risico. Hei-t oaver vogels? Politici bint net doeven. Veur de verkiezingen vret ze uut oen haand en hebt ze ’t ered, dan scheit z’oe op de kop. Kinders hebben hef ok een heleboel veurdelen, veural as ze oaveral deur ’t hele land hean woont, kom iej dr nog is uut. Zo was dr köttens een schoondochter joarig. Ik bin amper binnen of doar komt de kleinkinders anjoechteren, zie hadden rapporten ekregen, en dan kö-j de pottemenee wel löag kriegen heur. Veural Peter, net zes joar, had een bässens mooi rapport met zelfs een 10- veur rekkenen. Een steugie later kwamp dr een kennis binnen umme moe te filleciteren. En toen begreep ik die 10- ! Peter leup op den kennis toe en vreug: “Meneer, hè-j ok een pottemenee bie oe? Nee? Dan maa-j mien rapport ok niet zien.” Zol dr een bettie handelsgeest inzitten? En vri-jdag is ’t juni. Noe leazen ik net: “Junireagen is Gods zeagen, een bettie zunne dr bi-j, mäk boer en burger bli-j. En: vliegt dr ’s oams vleermoezen rond, krie-j mooi weer in d’ochtenstond. En vleermoezen zie-k hier ’s oams bie oos achter heel vake.

Artikel delen: