Dalfsen’s Plat: Zommer

Dalfsen’s Plat: Zommer

Joa jongs, wat was mie det köttens een bässens mooi gevuul. Met dè-k wakker wödden dach ik; hà jongs, vandage bint ze dr ammoa. Ik wazze vri-jdag joarig ewest en ’s zundags kwamen alle kinders en kleinkinders en an kommen lopend spul. Een groten koppel. Ik wazze zo trots as een pauwe, peslot binne wie mar met zien twiebeiden begunnen.

Etten hadde wie van te veuren kloar emäkt, ’t kon zo de magnetron in of effen op ’t gas. Volk hà-w zat umme te bedienen. Een mäkkelijk däggie. En wat boffen, mien verjoardag veult ok noe weer in juli, dus midden in de zommer. Ik hebbe wat det betreft altied zovölle geluk. Mien verjoardag is töt noe toe mar ien keer midden in de winter evallen. Hoe det zo kan? Ik wazze det joar met de vrouwe op vekansie an de zuudpool, pinguins kieken. Mar noe is ’t weer zommer.

 

‘k Geniete van oe,

zommer, iej lacht mie toe.

heerlijk zo buten

de zunne die schient

oen zörgen verdwient.

Roek iej det heui,

roek iej die dennen,

die härs?

Alles wördt riepe

de kleuren bint värs.

goat toch noa buten,

noa ’t water de futen,

de koekoek die röp

komnoe, komnoe

mar ok de roerdomp

zeg ko-omnoe-oe.

 

En det ik dr noe noa zeumtig joar nog altied mage wean, nog altied iets mage betekenen veur mien noageslacht en hoppelijk nog veur nog een paar aanderen ok, doar bin-k toch zo bere dankbaar veur. ’t Leaven hef zo bässens völle moois, mar wie wilt ut altied niet zien. Mar niet allenig ikke,  mar ok ieje, al hè-j ok nog zovölle zörgen, ok ieje maagt dr wean!

 

 

 

 

 

 

 

 

 

 

 

 

Wean.

 

Iej maagt dr wean

weerd wean, licht wean

licht veur een aander

noe, vandage.

 

Haanden vol licht,

haanden vol wärmte,

gemen maa-j,

deelt ut mar uut.

 

Een haand maa-j wean

een voet maa-j wean

een ärm um een scholder

noe, vandage as older.

 

Dè-j dr joa bint

met een härt

een gezicht

dè-s oen gewicht.

 

Dè-s oen gewicht

oen wärklijke weerde

doet zo mar deur

hier op earde.

 

Dan breng iej,

’t is plicht,

ok aanderen

det Licht.

Artikel delen: