Dalfsen’s Plat: Schriever

Dalfsen’s Plat: Schriever

’t Is nog altied zommer, dus ok noe nog mar weer wat licht te verteren kost opschriemen. Schriemen; ik denke det dr misschien niet iens zovölle gemeenten bint woar as ze zovölle echte Schrievers hebt as bie oos in Dalfsen. Ik telle dr allenig in ’t tillefoonboek à zo’n stuk of viementwintig. Of ze ok ammoa schrieft weet ik niet. Mar wat ik wè wete is det een schriever schrif veur zien plezier, en hopt det e dr een aander ok nog een plezier met dut. Doarumme giet zien pad meestentieds oaver rozen, de bloemen woar as e zo uutbundig van genöt, bloemleazingen proat ze dan ok wei-s oaver. Mar soms is ’t ok in zien hässens groten ärmoed, dan streepte de boel mar weer deur, dan wil ut niet vlotten. Dan vuult e de doorns van die rozen, die doet um dan zeer. Läst kwam ik een schriever tegen, die prachtig schrieven kon, en toch was ’t een bettie een dooie piere, hij had beveurbeeld ok nooit, hoe graag of e ok wol, een passende vrouwe können vinnen. toen dach ik:

As schriever genöt e grote waardering

hij wördt zelfs uutbundig e-eerd.

Mar lidt op ’t gebied van de liefde, ontbering

zodet e dus ondanks al die verering;

liever is wörden an-ehaald, as weer e-citeerd.

Hij hef mie verteld det e zich later wil loaten cremeren, en zien asse wil loaten uutstreuien. Ik bin bange det ze dan van um zegt:

Den schriever,

den dreugen,

is ut niet kras,

niet verbluffend,

det den saaien

bie ’t verstreuien

van zien as,

toch nog stof

op dut weaien?

En dan noe nog ien läste gedichie, oaver hoe ’t mie vrogger vergunk.

Vrogger.

 

As ik mooi an ’t spöllen ware

mos dr altied wat.

Henk wi-j effen hölties halen?

Haalt de bak is vol met törf.

Henk ik mut de rooie kool nog kokken

mar de kruudnagels bint op.

Toe wi-j effen ni-jen halen?

Mar graag drekt op stob.

Bin-k an ’t beumpie klimmen,

moe röp Henkie kom is gauw,

‘k mut de wasse spulen,

op is ’t zäkkie blauw.

Kö-j oe noe veurstellen

woarum ‘k ait de hort op waa?

juust as ik dr mar niet ware,

was ik ok niet de sigaar!

Artikel delen: