Disse uutdrukking hebt jullie denk ik ok wei-s eheurd. Mar veurige wekke wörden mie zo effen in de gank (in ’t veurbi-jgaon) in ’t oor efluusterd waor den uutdrukking vandan kömp, ik binne, nieds dè-k op zukke dingen binne, dr drekt met gangs egaon. Wat dach iej? Uut de kärke! Jao, kiek mar niet zo verwonderd, ut is mie echt veur waor verteld. Vrogger reuk ut in de kärke altied een bettie bedompt, of umme ’t stärker te vertellen ut stunk dr vaeke. Hoe det kwamp? Nou, umme det dr ok toen al meansen störven, ’t gewone volk wörden gewoon buten in de tuun, de hof van de kärke, ut kärkhof dus, begraven, det gaf gien probleem, mar die rieken! Die rieken kregen een rieke begrafenisse, zie wörden in de kärke zelf begraven, vandaor det gestink. En wat krie-j dan as ’t volk ’s zundes de kärke inkömp:”Oh, ik roeke ’t al, daor is van de wekke weer zo’n rieke stinkerd begraven.” Vandaor dus. ’t Is ok niet zo’n groot wonder, det ze stunken, ’t gewone volk wassen zich met water en zepe, mar die rieke lu baden zich in weelde. Noe iets heel aans, wanneer bi-j eigenlijk rieke? A-j twie kinders hebt, een jongen en een meisie? Hier misschien wè, hier nuumt ze det een riekeluus wens, mar ik leazen net:” Drie tochters en drie sonen in  leven  is een keuninklijk gegeven.” Zuud Nederlands. En In Friesland? “Twa jonges en twa femkes is rikelius winsk”. Zo zie-j mar weer, dr is gien meanse en gien streek geliek. Wanneer bi-j dan rieke, à-j een bult geld hebt? Mudde wie dan det sprekwoord;” Geld mäk niet gelukkig”, mar schrappen? Waor heur iej zelf bie, bie de lu die geld as water verdiend of bie die, die ’t niet op de rugge gruuit. Of smiet iej ut in ’t water of aover de balke? Zolange à-j mar niet met goed geld naor kwaod geld smiet, want dan schien iej volgens de boeken niet te deugen, en: “Gien geld gien Zwitsers.” De Zwitsers maken vrogger van ut waopens dragen een beroep. Zie wörden dan ok deur alleman die een bettie keuninkie wol spöllen in-ehuurd. Later wörden dit sprekwoord ok veur aandere dingen gebruukt. A-j gien geld hebt kö-j niks kopen. Zelfs vun ik de uutdrukking: “Gien geld gien paternoster en, gien geld gien misse.” Ik vernemme wel altied det geld een hoop macht gif. Want, al bi-j nog zo goed in de politiek, mar niet dubbel en dwärs millionair, dan hoef iej niet an een verkiezingscampagne veur president van de VS te beginnen. En wat de meansen ammoa wè doet veur een paar cent. As läste: “Tied is geld.” Dus kan ik mie gewoon bie de ärmen rekkenen, want ik komme altied tied te körte. Vreug dr mie ok nog iene warumme ik beveurbeeld nieds schrieve, iej zegt toch niets? Jao, inderdaod, mar det hef een heel aandere betekenis. A-j äns nieds op bint kömp det van niedig, dus laot ik die d staon. In oze standaardtaal schrief iej bloed toch ok niet met een t, nou dan, niet zeuren Jäntie.