Dalfsen’s Plat: Vriemaken, geliekstellen

Dalfsen’s Plat: Vriemaken, geliekstellen

daor is in disse tied nog al wat aover te doen. De minister hef heel wat tongen en pennen lös-emäkt.Now, ik kenne een zwarte Piet, die det ammao heel goed met emaekt hef. Ik wete niet of ut det ekommen is deur de pille of de auto, ik denke ut niet, ik denke det ut bie haar angeboren is, mar disse vrouwelijke Piet is merakels bie de tied.

 

Zie had ok eleazen aover oonze scrabblewoede, oftewel letterspellegies. Daor hef ze schitterend op in ehaokt. Wie kregen een spellegie lettervretten. Det kan met zien beiden edaon wörden. As ien van jullie zich eroepen vuult, dan maekt mar is een ofspröakie, à-j teminste een goeie mage hebt. Ik hebbe ok, net as nog een stuk of wat meer, een kedogie ekregen van Het Net, ik kan noe nao Sunterklaos gis niet meer mailen, en ok is dr een heleboel meer mis met mien computer. ’t Zal ammao wel op zien tied weer terechte kommen, mar dit stukkie zit ik hier te tikken op een liencomputer van een goeie, wat zeg ik, hele beste vriend.

 
Advent. Nog twie dagen, en wie hebt midwinter, de langste nacht. Mar; ’t is nog nooit zo donker ewest of ’t wördt wè weer licht.Waopens wördt een maol um-esmeed in ploegscheren. Wat een prachtig verschiet. Zie-j det à veur oe? An de raand van de Sahara, bie de Negeb, de Gobi, en net baoven Kaboel ammao grote smeltaovens, waor as tanks en det soort van gerei wördt um-esmölten. Duzenden soldaoten op trekkers an ’t ploegen e an ’t zeaien. Honderden helicopters gangs met mest en aalte streuien. Met hele grote pompen wördt millioenen liters water langs zuveringsstations uut de zee ezöagen umme ut dörstige laand vruchtbaar te maeken. De woestein giet bluuien as een roze. En det niet allenig, ut mes snidt van twie kaanten. Deur al det water det uut zee epompt wördt umme de grond zam te maken, stig de zeespiegel niet meer, deur de eorme grote vlakten gruun die dr biekomt, kan oonze earde weer aodemhalen, de ozonlaoge kömp weer op peil, de ieskappe gruuit zelfs à weer een bettie an. Aandere soldaoten bint an ’t schoelen en ziekenhuzen bouwen; en näns op disse hele wereld hef dr nog ien meanse honger. Mu-j daor is kieken, zovölle soldaten gangs schoelen en ziekenhuzen te bouwen, hé de gevangissen wördt of-ebrökken, niet meer neudig. Belasting wördt of-eschaft, de minister höldt an de vri-jwillige bi-jdragen nog geld aover, zo graag geeft de meansen as ut mar goed besteed wördt. En… ut alder, aldermooiste; aoveral op de märktpleinen zie-j de kinders weer gangs met knikkers, hoepels, tollen en springtouwgies. Zie könt gewoon weer kind wean in plaatse van in febrieken te mutten staon. Mooi? Kan nooit? En waorumme niet? Azze wie noe ammao op oons eigen stekkie is begint, is de haanden uut de mouwen stekt, niet veur ikke, ikke, mar veur die aander, könne wie dan met mekare det bällegie niet an ’t rollen kriegen? Wis en zeker wè.

Artikel delen: