Dalfsen’s Plat: Meer plat

Dalfsen’s Plat: Meer plat

Plat, een steugie eléne, leup ik effen nao de briemenbusse veuran in de straote, wat zaag ik? ’t Hele brugplein stund vol met van die wichter met grote spandoeken met daorop de name van hun schoele.

Ik dache daor mu-k ‘t miende van hemmen. Gaot ze äns teagen demonstreren of zo? Niks heur reusie, eerst sprök ik een paar olderen an, die d’r ok bi-j waren, en toen wus ik metiene wat d’r loos was, die luu sprökken Duuts, det waren manluu uut oonze zustergemeente Hörstel, aorige luu heur, niks mis met. Ok mar effen een pröötie emäkt met wat jongeluu, hoe is’t jongs, könt jullie wè met die Duutserties praoten? Jao, mar wie praot dan ok meestentieds in ’t Engels met mekare zeaden d’r een paar. Mar een stuk of wat aanderen hadden ut better eschötten, die waren echt heel dikke in ’t veurdeel, die preuten gewoon in oons eigen Dalfsers met die aandere jongen, en dan gunk ut völle better. Niks gien HHD (Hoog Haarlemmer Dieks), nee gewoon ABN (Algemeen Beschaafd Nedersaksisch). Zo zie-j mar weer waor een twietalige opvoeding goed veur is.

Meer plat, wie hebt de dialectmaond weer achter oons, ok al hef in Dalfsen, denk ik zo, de gemeenteraod in haar vergadering d’r niet an met-edaon. Mar ja, hemao ongeliek kan’k ze ok nie gemen. Wie mochen vrogger thuus as d’r vremd volk bi-j was, det ut Dalfsers niet machtig was, ok niet plat praoten, det was niet netties teagenaover oen gasten. Noe kwamp det ok umme det bie mien va zien kennissen een paar Friezen waren, die ut nooit konnen laoten umme toch eigenwies in hun eigen taaltie met mekare te konkelefoezen, onfesoenlijke vlegels numen de det. Det ter ziede. En noe: Veurjaor, wie zit dus in april, ’t is weer läkker lange licht ’s aoms en aoveral bluuit d’r à weer zuk mooi spul. A-j zo wat rond riedt op ’t rad, dan zie-j zovölle moois. Grote velden speenkruud, de kätties zwelt op, aoveral van det mooie jonge tere gruun. Vogels bint an ’t nöstelen, fezantehaenen en petriezen maekt de vrouwgies weer ut hof, ’t is ien en al leamen buten. Grutto’s, kieften, scholäksters en wulpen heur iej à van veerten. En bie Bellingeweer heur iej de roerdompen weer pompen. En noe verbaasd mie ien ding. Mu-j is langs de Blauwe Diek, de Heinose weg en zo um oe hean kieken. Wat zie-j dan? De traonen zollen d’r oe bi-j in de ogen schieten. Onwies völle singelties en opslag is daor vot-ekapt. Zie hebt natuurlijk net noe een bulte subsidie uut Brussel ekregen en det mut dan op, mar umme d’r noe zo’n grote puinhoop van te maken, det is mie toch net bärre genogt. Waor mut noe de reeën, de fezanten de petriezen en det soort van spul van ‘t jaor schulen as d’r onraod is? Die hebt toch nooit genogt veilige schuulplasies aover-ehaolen? Baovendien vin ik ut ok nog niet mooi ok al die grote kale stukken. Zie zölt ut wè weer anpaoten natuurlijk, mar had det noe niet wat meer aover verschillende jaoren verdeeld können wörden? Of heb ik d’r gien verstaand van? Veur iene ienzame boom uut oen tuun, mu-j wel eerst een kapvergunning anvraogen. Hogere wiesheid? Nou ja, ärger oe niet, verwonder oe slechts.

Artikel delen: