Dalfsen’s Plat: 4 mei

Dalfsen’s Plat: 4 mei

Binnenkort is ’t weer 4 mei, dan staode wi-j toch weer een steugie stille bi-j wat d’r, noe à weer meer as een halve eeuw terugge, ammao passeerd is. Dan denke wi-j terugge an luu diede wi-j goed kennen, en die umme ekommen bint. Ikke beveurbeeld an Anne Haan een zunne van Jan van Zwolle die dood-eschötten is op 6 oktober 1944, hij was mar een bettie older as ikke.

 

En die beide jongs Willem en Jacob Tensen waor ik ok vake met een bosschop an huus kwamme, 30 september 1944. En Baarsma en van Veen natuurlijk die vake bi-j oons thuus kwammen. Mar wat denk ik ok met dankbaarheid terugge an zo’n hoop meansen die deur toedoen van mien va, mar ok wel een bettie deur miezelf, den oorlog aoverleaft hebt. Ik wete nog det vlak nao ‘n oorlog Frits de Zwärver bi-j een gedachtenis zea: “Blief knokken teengen ut kwaod”. Daorumme:

Stao een steugie stille.

Iederiene, jong of old
kent wel oorlog.
Den is veurbi-j
oenten nooit.

Niet met emäkt?
det hà-j edacht.
Alle daangen
nao meer as vieftig jaor
trekt ze
an oen oongen veurbi-j.

Noord Ieren,
Jeuden,
Pallestijnen
en Molukkers.
Koerden,
Basken
Taliban en
ongelukkers.

Daorumme,
Stao een steugie stille,
bie die luu
die toen umkwammen.
D’r an denken is:
Ze respecteren
en proberen
net as zie:
Een toekomst van vrea
lös te haolen
veur luu,
die nao oons komt.

Artikel delen: