DALSEN – Veurige wekke, waar ik bej mien neefie in Ankum opt huus woar mien va geboorn is. Mien opa en oma hebt dr ewoont en haddn dr een boerderije. Mien ome heff det ooit över enummn en latere mien neefie en die is dr noe dus boer. Met ut anrien zaag ik dit sleutie. Op dit sleutie heb ik ooit leern skaatsn.

Dan ginge wej op visite bej opa en oma en lag dr ies op. Popgroep Normaal sung dr van, ies kan liene. Nö as dat ies kon liene, konnie skaatsn. Mar wat een mieters smal sleutie. Ik kan mej herinnern det wej menare int teegn skaatsn op det sleutie. Det kan toch helemoale nie op zo’n smal sleutie? Det sleutie is ok nie uut egraam of smaller emak, volgens mej.

Mien neefie kon mej dat verkloarn.

Kiek, zeg hej. Ut waterskap hef in Ankum en op de Bese allemaole grotere en bredere sloatn egraam. Doardeur kant water vulle sneller vot en ok eemtueel an evoert wurdn. Vröger in oe tied ( miende dus ) was det nie zo en bleef twater vulle langer in de sloatn mar ok op de weilandn stoane en ast dan begunn te vriezn, kon ie övera skaatsn loopn. Ja hej heft dan över skaatsn loopn, woarumme dat loopn dr achteran mut snap ik ok nie. Mar is wel duudlijk, as dat water een halve meter hoger in det sleutie stiet, is det ding in iene keer 2 meter breed en kon kleine Gruune Jopie weh iemand tegemoet kommn opt ies.

Groetn Gruune Jopie