DALFSEN – Het begun zo: Goeien oamd, beste leu; Mien name is Wim Schriever ofwel WvdV, een name die u vaker teengkomt op Dalfsennet. Vanoamd nem ik jullie met in de geschiedenis van Dalfsennet en doe het zovulle meugeluk in de sprektaal hier in Dalfsen, dus gewoon plat. Ik mut èèmn een joar trugge;
Willy kreeg veurig joar november van Henry Grootenhuis de vroage om hier in dit theater te verteln. Wie of wat is Dalfsennet. Hoe is Dalfsennet ontstoan en wie zit er allemoal in. Mar Willy was doar erg dudeluk in, ik doe de‘t in gien geval. Goa mar naar mijn breur die weet der ok wel wat van.
Noe stoa ik dan hier, en zak probeern det uut te uitlegn, mar eerst wie is dan Willy. Willy is mien jongste breur, geboorn op 1 april 1955 int opkamertje bij mie moe in berre, een dikke 9 ponder, ja zelfs bienoa 10 pond.
Mien va had een klein boerdereijgie, slechte grond, en op stoefzaand of wel klapzaand wul niks gruuien, mar in huis wolt wel gruuien. Want Willy was al de 12e in een koppel van 13 wichter en kreeg de deupnaam met van Willibrordus Johannes Fransicus.
Willy was ‘n eesten die in Hoonhorst naor de kleuterschoele gung, veur die tied was er nog gien kleuterschoele. Daangs biena 4 km loopn naor Hoonhorst, want fietsen had’n wiej toen nog nie.
Willy gung naoa de basisschoele noar een bakkersopleiding, det zat der al vrog in. Mar hij mos zin werk helaas al rap stoppen als gevolg van een bakkers eczeem. Hiernoa hef Willy nog een aantal joaren ewerkt, jaowel als meubelstoffeerder in Zwolle.
Rond de zestiger jaoren werd een deel van oons laand gebruikt veur de komst van de eerste kampeerders, en zo ontstund er de camping die later deur mien breur Jan werd erund. Willy huulp regelmoatig met in de kantine ast druk was, en de camping gruuin. En het kwam zover dat Jan definitief hulpe neudig had in de kantine, ofwel de horeca afdeling.
Zo is het uuteindluk van ekom’n dat Willy 45 jaor trugge de horeca, dus “Het Boskamp” van Jan hef oavernum. Het helemoal angepast, verbouwd en uut-ebreid.. Gericht op meer bezukers, klantvriendeluk en veural door nog meer activiteiten te organisern zoas langlaufen, klootschietn, speurtochn, vossenjachen, huifkartochen enz enz.
Willy bedach oaltied wel weer wat nieuws; zoas het boergondisch èètn (jao gewoon met 10 vingers èèten en de soep uut de komme opslurpen, dus helemoal zonder bestek) en dan de foute boekingn. (zogenaamd vergetten te boekn, gasten mostn het èèten zelf kloar maakn in de keukn). Hylarisch, mar hele bizundere evaringn veur de gastn.
Willy heuld van ofwisseling, mar wulde ook met van oalles op de heugte bliem, dat lag al in zijn aard. Als kind was hij oaveral te vindn met zin eign transitoradio. Willy was een verwoed luusteraar van de vulle politie zenders in de regio. Hij luusterde ok oalle politiekanaln of die mar te ontvangn waar’n. Alle ongelukkn of andere gebeurteniss’n en veural plaatseluk nieuws volgde hij oltied, Zo blef e oaveral mee op de heugte.
Hij ergern zich an de verschillende kraantn en weekblaad’n die het plaatseluk nieuws, volgens hem slech of helemoal niet brachen. Ingezunden stukkn werdn niet eplaatst en als inwoner van Dalfsen bleef iej van heel vulle nieuws verstökk’n, was zin mening. Die ergernis hef hem nooit losgeloaten, doar mos een oplossing veur wee,n. Maar hoe pakt wie dit noe an.
Willy kwam in contact met een olde kammeroad die regelmaotig bij het Boskamp kwam. Gesprekk’n kwamn op gang en loat het nu net die persoon wee’n die zoiets heeft op’pezet in Roalte als “Roalte Net”. Samen keekkn ze noar de mogelukheed’n van een eigen site en de risico’s doarvan. Willy kwam direct actie…
Willy gung met zin zunne Stephan op bezuuk in Roalte en al snel werd het eerste computersysteem in de vörm van een site e’mak. Met nog meer hulpe van ‘n buurjong werd ’t etest, en Willy gung op pad om foto’s te maak’n. Pas het derde systeem, emak saam met Bert van Oenen was zover dat hij doar verder met kon.
Het resultaot was veur hem in die tied al “verbluffend “ zoas hij det noe zelf nuumt.
De basis veur Dalfsennet is zo ontstaon. Doar kunt en mut wie verder met was zin mening.
Het was 2007/2008. De bouwplann voor ‘t nieuwe gemeentehuus in Dalfsen gung beginn, daor ligt mien kaans. Willy gung eerst in gesprek met de gemeente veurlichter, mar die was er nie erg van gediend om informatie te verstrekkn. Der kwaamn zovölle journalist’n en andern an de deure die mar tegen de bouw wilden protesteern. Daor stunden ze ech nie op te wachen.
Pas noadat Willy zin doel van de site dudeluk had emaak en had anne geven dat het juust een positief verslaggeving van de bouw mos word’n, sleug de stemming omme en kreege de gevraogde informatie en zelfs nog adviez’n van de gemeente.
De veurtgang van de bouw van het gemeentehuis werd elke wekke mooi in beeld ebrach en iederiene was er bliej met. Voor Willy was het dudeluk dat er veulle extra tied in giet zitten, wat eigenluk pas kon is noa de oamdsluting van zin horeca. Dus werd ‘t nachwerk. Want de site mos helemoal onafhankeluk draai’n van Het Boskamp.
Van ‘t iene kwam ‘t ander. Willy kreeg hulpe van andern umme de site te verbettern. Willy kwam met meer meensen en verenigingn in contact en kreeg zo de kaans ’t nieuws verdr uut te breidn. Det gung al zo hard det in het joar 2009 de teller al op 300.000 bezuuken stund. Dus al nao een goed joar gerealiseerd.
Dalfsennet gruuide elk joar harder en er kwaa’m meer vaste vriejwilligers bie zoals Johan Bokma en Henk Gerritsen, oaveral nieuws haaln en Dalfsennet werd steeds meer een begrip.
Ondergetekende levern in ut begin veural artikeln an van “üut de olde Deuze”, dus verhaaln oaver vrogger.
Ik kreeg rond 2015 de vroage om de verslaggeving te doen van alle Commissie- en Roadsvergaderingn van de Gemeente Dalfsen.
Dat hek oppepakt, mar ok om met het College van Dalfsen bie bedriemen op bezuuk te gaan, noar grote bedriem in de hele gemeente um doar een verslag van te maakn. Zelfs met noar het Landgoed Rechtern om doar in de Ridderzaal getuge te wee’n van hun toekomstplann. Toen grotendeels nog geheim, mar wel heel biezunder.
Joarenlang hek de joarvergaderingen biegewoond van de verengingn van Plaatseluk belang in de hele gemeente, veur een verslag op Dalfsennet.
Met Dalfsennet is heel hard verder egoan. Kiek eens naar de vulle sportberichen, veural in het weekend. Verslaag’n van beurzen, tentoonstellingn en van wandelingn in de natuur. De berichen om verlorn slöttels, bankpassen, jassen en weggeloop’n kattn of hondn. Vake dezelfde dag nog oppelöst en bie de eigenaar trugge.
Het laatste joar ook de oaverliedensberichen die nog dezelfde dag geplaatst word’n, doar kan geen kraante tegenop. Uutvaart-ondernemingn kunt die berichen zelf plaasn veur een heel klein priessie.
Ok Dalfser bedriemn kunt doar meer gebruuk maakn, goedkoop adverteren op Dalfsennet en um een mooi verhaaltie oaver oe bedrief te plaatsen is nooit weg.
Willy had zelf een vaste gewoonte elke moandag op de fietse un rundje te doen deur de gemeente Dalfsen, verhaln haaln om verhaaln te brengn, oaveral wasse te vind’n, oaveral is wat oaver te vertell’n.
De moandag was zin ienigste vrie’e dag in de horeca die veur een groot deel wörd’n invult veur Dalfsennet.
Willy heuld ook van 1 april grappen, dat heffe nooit offeleerd. Ok op Dalfsennet bint mooie veurbeelden bekend, zoals met zin dierentuin. Jopie was al bezig achter zin bedrief een dierentuin in te richt’n. De gemeente in rep en roer, dat kon nie woar weern, er was immers niks annevroagd, mar toch… ach. Dit was echt iets voor Jopie. Maar van Willy kwam ok met een verhaal dat er windmols geplaatst zoln wordn in de bossen van het Rechterenseveld. De bouw was inmiddels begunnen… of toch weer 1 april grap.
Dit is iets wat Willy oltied is bliem doen en nog wel op zin verjoardag, 1 april.
Dalfsennet is inmiddels onmisbaar ewordn in heel Dalfsen. Niet alleen voor Dalfsen zelf, mar ok old Dalfsenaren, die noar het butenlaand vertrokk’n bint, die blieft Dalfsennet op afstaand volgn. Heel vake kriegt wie de mooiste reacties uut het butenlaand. Mar ook van vaste campinggasten die Dalfsennet thuis volgt, woardeur er een mooie binding met Dalfsen ontstiet.
In 2015 begunn met het in beeld brengn van oalle Gemeentelijke- en Rijksmonumentn, met daarbie de originele tekstn uit het monumentenregister. Elke zundagmön vrog op pad met de mountainbike en een kleine camera um alles vast te leg’n, zo in de hele gemeente. Niet te vergettn de mooie en biezundere landgoedern die Dalfsen hef. Zo bint oalle monumenten in de hele gemeente op de site van Dalfsennet trechte ekomen en… trugge te vindn.
Dan het blad “Magazine Dalfsennet” die kwam in de luch deurdet een uutgever uit Leeuwarden mee wol liftn op het succes van Dalfsennet. Ofspraak was um deur oons in elk nummer een artikel te schriem over “Old Dalfsen”. Det levern hele mooie gesprekkn en opnames met olde inwoners op. Mar ook het duken in het verre verleedn, zo’as het ontstoan van Lemelerveld, de Oldo spoorlijn, het graam van het Overiessels kanaal en van de Dedemsvoart, het ontstoan van Old- en Nieuwleusen en van Dalmsholte en heel vulle meer.
Mooie gesprekkn met olde persoonn zoals Frits van Lenthe, Albert Roessink, Jan Bos, Herman Herbrink, holtzagerieje Meulenbeld. Joop van de Stuwe en vulle andern, mooie weerdevolle resultaat’n voor 4 uutgaem per joar.
Nao 2019 bint alle biezondere en monumentale boomn in de hele gemeente op de site ekomm. Nooit ewetn dat veulle boomn een “Rijksmonument” bint, en vermeld bint in het “Rijksbomen Register”. Veulle tips van particuliern oaver biezöndere boomn binn-ekreegn, mar ok een boomnboek van de Vrienden van Dalfsen met mooie informatie.
Dan de rol van ooze vriejwilligers.
Een grote spil bie de vriejwilligers was Johan Bokma, Johan al betröokk’n bie Dalfsennet veur 2011. Johan was een belangrieke fotograaf die in de eerste joaren vulle op pad ging um nieuws te haaln.
Bie biena alle sportverenigingn en festiviteitn was Johan anwezig. De Trefkoele was zien domein. Johan werd oaveral gevroagd en er werd hard aan hem getrökk’n. Ook de gemeente Dalfsen deed vake een beroep op Johan omdat hij zulke goede foto’s maaken, o.a bij de joarlukse lintjesreengs.
De bouw van het Waterfront hef hij vanaf het begin van de sloop, tot het ende van de bouw in beeld gebrach saamn met Paul Scholten. Eemals de bouw van de nieuwe TrefkoelePlus, het Vitensgebouw in de Marshoek.
Hij was als fotograaf bie allerlei wedstrieden en muziekevenementen in de gehele gemeente anwezig. Helaas hef Johan vorig jaar oktober beslöttn een stappie trugge te doen om ruumte te maakn voor zin andere hobby’s. Johan hef zijn spoorn hier meer dan dikke verdiend. Toch is Johan gelukkig nooit helemaol uut beeld verdween en springt ie nog vake bie waor het neudig is.
Een vaste andere vriejwilliger van het eerste uur als verslaggever en fotograaf is HG ofwel Henk Gerrits. Henk ook al ongeveer 15 joar actief veur Dalfsennet. Henk is ok de man die heel vulle op film vasteleg.
Zoas auto- en motortreffn in de hele gemeente. Ok tentfeestn, kerstmarken, intochen, wandeldriedaagse, ongevalln en brandmeldingn enz.. Henk is oaveral te vindn. Veural in de umstreeken van Oldleusen tot Vinkenbuurt en Nieuwleusen giet hem niks mis.
Dan fotograaf Paul Scholten. Ok hij lèvert een mooie biedrage aan het nieuws uut Dalfsen. Oaveral in de gemeente struint hij marktn en braderieën of met het bord “Dalfsennet”, veur meer bekendheid. Ook zin actie, “Man met pet” was succesvol. Paul giet regelmatig op pad um berichtn te haaln en te voorzien van prachtige foto’s.
Nieuwe vriejwilligers. Een deel van een open plaaste is gelukkig weer annevuld met Femmie Smink als een hele biezondere natuurfotografe, die vriewel dageluks in een grote regio op pad giet en fantastische foto’s uut de natuur en verhaaln an-levert. Het gebied Nieuwleusen zal ze ok meer onder de aandach brengn. Een geweldige inzet en geweldig mooie detailfoto’s. Doar kan ik nie tegenop. Wat een prestatie…
Nog een nieuwe vriejwilliger, Art de Ruiter uit Dalfsen, een leerling journalist die wat ervaring op wul doen en zal probeern meer nieuws uut de hele gemeente binn haaln. Art hef al prachtige verslaagn en mooie gesprekk’n met inwoners anneleverd. Is noe nog gangs met verslaang in oaverlag met de gemeente.
Kiek mar een keer trugge op Dalfsennet en tik op “zuuken” ..vul een name of een onderwerp in. Iej stoat versteld van de hoeveelheid foto’s, onderwerpn uut de natuur, geweldige mooie verhaaln en natuurluk heel völle geschiedenis en nieuws oaver de laatste joaren in de hele gemeente Dalfsen.
Achter de schermn mar niet in beeld is onze webmastr Pim Haarsma, die al vule joaren zorg draagt dat het systeem goed blef draain, hij is onmisbaar dat blek iedere keer mar weer opnieuw.
En iemand die wie zeker niet magt vergett’n is Bert van Oenen. Bert is al vanaf de eerste start van Dalfsennet een belangrieke schakel gewes. Bert hef saamn met Willy en zin zunne Stephan de eerste sites emaak en doarop is verd’r ewerkt.
Bert hef noe min of meer de functie van controller. Hij is veural bezig met binn-ekomn berichen te controleern zodat er gin ongewenste artikeln eplaatst wörd. Op Dalfsennet is gin plaatse om klachen teeng de gemeente of teeng anderen uit te spel’n, wie blieft onafhankeluk. Bert controleert de ingekomn stukkn ok, zodat we niet buten de wet loopt, wiej van Dalfsenet wilt gien risico loopn, ondanks dat het goed is onder-ebracht bie un stichting.
Verder is Bert druk met het biehoaln van agenda’s op de site. Hij speurt oaveral berichn op die veur Dalfsennet van belang kunnt ween en plaatst die in de agenda.
Maar tieden verandert. Noe Willy Het Boskamp hef verkoch, was hij de hele zomer dageluks in een stroale van 25 km rond Dalfsen te vindn. In buurtdörpn woar hij eigenluk nog nooit is ewes. Hij kek zin ogen uut en veural de prachtige dörpsfeestn die oaveral worden geholdn. Det was veur hem helemoal nieuw. Hij was der alle daangs druk met en dat was ok te zie’n aan het aantal bezukers op de site.
Maar het is duudeluk, Dalfsennet kan niet zonder vriejwilligers, dat is noe net oons probleem.
Het is voor de vriejwilligers niet meugelijk oaveral aanwezig te wee’n n. Gelukkig merkn wie de laatste joaren dat steeds meer verenigingn hun eigen sportverslaagn anlevert, mar ook dat inwoners artikeln van belang an levert. Ok vanuut de gemeente komt steeds meer berichtn binn, doar is Willy bliej met.
Zo is Dalfsennet “De nieuwssite in de hele gemeente Dalfsen” gewordn.
De teller van Dalfsennet stiet noe noa 18 joar nieuws brengn op meer dan 132.000.000 miljoen bezukers, dat is 132 met 6 nullen, een gigantisch aantal. Dat is het aantal wat op berichen is gekekkn.
Dagelijks tussen de 20.000 en 60.000, met soms grote uutschieters ver doar boaven.
Eene grote uutschieter was un berich van Krijn Hoogenboom uit Lemelerveld met een energiebespoarende moatregel , hij nuumde dit “Van het gas af” voor € 8500,- “ . Dit lèverde ongekend veulle en wel 112.428 volgers op en werd zowel door de regionale en zelfs de landelukke pers oavergenomn. Zelfs de telegraaf hef dit artikel oavernum van Dalfsennet.
Ja juust, en doar dut Willy het veur. Zin opzet ruum18 jaar trugge is meer dan eslaagd
Dalfsennet. De nieuwssite uut oe eing omgeving.
Willy kan oe er zelf nog vulle meer over vertelln, zeker aj graag vriewilliger wult won, want doarin kunt wie best versterking gebruken, veural um ut plaatseluk nieuws nog better te breng.
Dus eigenluk op zuuk noa een nieuwsjager, neem contact op met Willy.
Tot zover mien biedrage oaver Dalfsennet.