LEMELERVELD – Dur wurd vake annenum det met drank op ieje un bult meer plezier kunt hem. Mar det is niet ait waor. Dur  bint ok zaakn waorbie det kats nie zo is. Assie met un zatte harsens achter ut stuur kroept, kump daor allenig mar ellende van.  Ok luu die te veule op hebt kriegt mangs vaker ruzie of trammelant.

Met un groep uutgaon, dan wul iederiene ok metdoen. Aster dan gieniene is die zurgt det ut spul veilig bie huus kump, kunter grote probleem komn.Toch waster un jonge vent die saoms thuus kwaamp en hij had um ok al aorig zitn. Hij kwaamp zie va teegn en vreug zien va offe vrogger ok vake zat ewes was. Zien va zei toen dette nooit donken ewes was en de zeune zei toen dette dan ok niet wus watte emist had.

Aster met un busse nor un feessie egaone wurd, kunt de luu in die busse a vaste begun ween met indrinkn. In de busse kunt ze un bult kratties meeslepn en as de radio in de busse un bult lawaai en lieties lut heurn kan ut een goed sfeertie wurn. Op det feessie kunt ze dan genog kriegn um niet meer un bonke dust te haoln. Asse dan op de terugweg weer kratties bier mee gaot slepn in de busse,  vroggie oe toch aof of ze dan toch nog steeds dust hebt. Sommigen ligt a te pitn in de busse. In ieder geval wurd ze noe toch veilig thuus ebracht.

Ton