Isset wel te proemen? door Ton Schrijver

LEMELERVERLD – Kiek ieder mense mut etten op zien tied. Noe hebt ze in Lemelerveld een cursus kokken veur mannen holn. Meestal ist zo det de vrouwluu goat kokken. Uuteraard bint der ok we kerls die kokt, mar det bint dan koks of gewoon hobbyisten.

Vrogger bie oons thuus kwamie sooms bei huus uut skoole en dan mossie mar opwarmen wat er oaverbleem was van de middagpot.  Ik nemme an det zo’n cursus wel verder giet dan det soort praktijken. Assie as man allenig bint muj oe ok kunnen redden.

Ja der bint ok wel andere oplossingen, mar det is vake oarig duurder.

Assie veur iene allenig mut kokken is det ok nogal kloterig. Better kuj gewoon un hele panne vol kokken en dan de rest in de vriezer proppen, zodej ut later kunt opwarmn. Mar een getrouwde man met wichter die mut toch zich kun redden met kokken as sien vrouwe weg is um geld op te maken of zoiets. De vrouwe kan ok um minder plesante redenen wegwen. Vrouwen schreeuwt al jaoren det ze gelieke behandelt wilt wen as kerls. Kerls mut natuurlijk ok det vrouwenwerk niet uut de weggoan, anders bin ie een aap gelogeerd assit allenig mut doen. Een ei kokken of bakken det is niet zo muulek, mar een hele en ok nog gezonde maaltijd op taofel zetten daor muj toch ietwat kennis van zaken hem. Ik zelf gao wellis bosschappen doen en dan gebeurt ut wel eins dek blunders make. Ik nemme ait een briefie mee waor dan op stiet wak meute haaln. Ja, mien geheugen daor is niks mee an de hand heur, mar assie iets mun hem dan is het vake een heel gezuuk veur deit hebt.

Het kump welis veur det ik toch niet helemaol hebbe begrepen wat mien vrouwe noe precies mut hem. Zo stond der um keer op mien briefie: een pond mergpiepies. Dus ikke noar de koekenafdeling en nam een pak mergpiepies mee, mar mien vrouwe bedoeln mergpiepies veur in de soep.

Ja det kon ik toch ok nie roeken? Ok gebeurt ut wel eins dek veul te weinig greunte meenemme. Ie hebt van die bladgreunte die machtig slinkt. Assie det spul goat kokken hoalie der bienao niks van oaver.

En assie veur zes man wat mun hem wut det muulek um te verdeeln.  Die cursus in Lemelerveld lek mie toch wel nuttig um te gaon volgen. Aj honger hebt kuj ok uut etten gaon. Int verleden bink wellis noar een restaurant ewes det niet echt goedkoop was en assie zaagn wat der op taofel stond geleum ik mien ogen nie. Det was dan: nouvelle cuisine, zoas se det nuumt. Een bettie van dit en een bettie van det mar eigenluk lange nie genog van alles. Ik zeie teegn mien vrouwe det wiele hiernao tog mar em naor een snackbar mossen gaon want ik was bie lange nao nog niet zat. Wiele kreegn echter koffie met een sortering bonbons na en die hebt wiele allemaol op egetten. Bie un ander restaurant kreegn wiele zukke kleine stukkies vleis det wiele an de ober hebbe vraogt offet raam dichte mog anders zol et vleis oons van ut bord weijen. Ut is mie ok als is gebeurt det ut vleis nie hemaol gaar was en dus had ik een slieptolle neudig um det vleis te sneiden.

Ik gao der wel van uut dej gien gereedschap hoeft mee te nem aj uut eetn gaot. Mar ondanks alle ellende gebeurt ut ok wel det wiele in restaurant goed te etten kriegt en dan hej toch meer plezier, want iet betaalter tog veur um lekker etten te kriegn. Ton Schiever.

Artikel delen: