ut metselwerk an de oostkaante is nou klaor.

DALFSEN – ’t Is al un poosie ‘eleen det ik wat eb laot’n zien van de bouw van de woontoor’n in de Gerner Marke. Mar zie ebt toch de hele tied niet stille ‘ezett’n. Nao de bouwvakvakaansie bint ze direct ganks ‘egaon met ut metselwerk.

ze gaot nou beginn’n met de westkaante

 

D’r is un vaste kraane ‘ekommen en die ef met iene ploeg de kozien’n d’r veur’ehang’n en ondertöss’n is ter un metselploeg begönn’n met ut metsel’n. De kozien’n wut an de grond veurzien van un betonn’n omranding en dan in zien geheel met de kraane naor boom ‘ehees’n. Daor wut ze met bolt’n vast’ezet an de betonn’n binn’nmuure.

de kozien’n wut in zien geheel op’eheese’n en vanof un schaarhoogwerker vast’ezet.

Daornao wut ze vast’emetselt in de buut’nmuure. De ene kaante is nou klaor en an de andere kaante kunt ze nou beginn’n met metsel’n. De kozien’n angt d’r nou allemaol veur.Volgende weke kan ut glas d’r in en gaot ze met de kraane de betonn’n oaversteek ophang’n. Ze zet de kleppe an de pette kuj zegg’n.