Historische gegevens uit Sterrebosch boek Verhaal no.1:

DE HEMA: 1956.( door Anton Schrijver oftewel Anton van de Vosboer.)
Wiele mutt’n gaor’n koop’n veur Mama bie de Hema:  Jan en ikke waar’n in de buurte van de Hema in de Diezerstraote annekomm’n als ik teeg’n Jan zegge: “Hoe hiet zo’n bult gaorn bie mekaere ok al weer”. 

 Nou zegt Jan: “Daor zat ik zelf net ok al an te denk’n”. En vervolgens: “Wiele kiekt binn’n we; misschien stiet ’t wel op ’t prieskaartie”. Wiele naor de afdeling toe. Een jongedame vreug oons: “Kan ik u ergens mee helpen? Wiele allebeide tegelieke: “Wiele mut gaor’n hebb’n veur oonze Moe”.
Jan zegt: “En det mut ’n rolle weez’n”. En ik zegge: “Nee het is gin rolle mar ’n voss’n”.  Niet waor zegt Jan det hiet: “’n poeste”. Niet waor zegt ik, ’t is: “’n kladde”. Niet waor zegt Jan, det is iets wat in de rondte löp en oppewund’n is. Ik zegge: volgens mie is ’t ’n kloete. De verkoopster kik ons an asof zie waater zag braand’n. In ien keer had zie ’n kraakhelder idee, want zie zei : “Jullie moeder moet een KNOT garen hebben. Wat waar’n wiele blie; ’t lik wel of wiele de eerste pries ewunn’n hadd’n. Onderweg naor huus zakt’n det geveul steeds wieder weg. Hoe dichterbie wiele bie huus kwaam’n hoe minder as ’t wörd’n. Toe’w kortbie huus waar’n zaat’n wiele te scheld’n en te foeter’n: Waorumme kui’j in Dalfs’n, Heino, Raolte, Wiehe, ’n Hoonhorst, Lemelerveld, Zalk en Oldebroek en zelfs aover de Grenze wel normaal praot’n en niet in Zwolle.
Papa zei: “Brek mie de bek niet löss!! Mie Va Evert zei jaor’n terugge al det in Zwolle ’n KUNST-TAAL esprökken wörd’n, wat aovernömm’n is uut ’n aandere stad um te laot’n zien det hullie better in ’t heufd bint. Mar bie oons in de buurte gleuft niemand daor iets van!Bron: “HET DALFSER STERREBOSCH EN WIJDE OMGEVING”
 
 

 
 

Artikel delen: