As’t weer metwerkt, ku’j d’r van op an dat de bukkums dit joar veur de ofwisseling weer’s oaver’t water noar Dalfsen komt. Da’w niet uut e neudigt bint veur de vuurdoop van de Canon van Dalfsen begin november zit ons toch wel’n bettie dwars. Veurig joar ha’w d’r al op e zinspöllt, maar nee heur, gien mense doar in det diekgebouw kump schienbaar op’t idee um an die enthousiaste bukkums te denken.
’n Uutneudiging was toch in dit geval wel op zien plaatse e west, lek ons.
Niet da’w ok maar ienige illusie hebt da’w ok in die Canon e nuumt wud, maar det nemt niet weg da’w op cultureel, historisch en recreatief niveau toch wel ’t ien en aander an de Dalfser geschiedenis van de laatste halve eeuw hebt bij e draag’n. Misschien bi’w wel niet altied em’n inschikkelijk en positief in e stelt, maar doar is dan ok wel vaake ’n reed’n veur. Wij hebt al zo vaake wat an e kaart en veur e stelt, maar denk maar niet da’j d’r ooit wat van trugge heurt. Loat stoan dat d’r wat met e doan wud. Het lek wel politiek!
Det hele Waterfront-gedoe beveurbild, hebbe wij zeker twintig joar gelee’n al op’n heel aandere maniere en veurniks onder de aandacht e bracht. Gien enkele reactie, ie snapt het al: plannen op dit niveau mut geld kosten, aanders gleuft d’r gien iene in. Wij zult rustig of wacht’n wat d’r van kump. Het lek allemoal aaklig mooi op zo’n website, maar in werkelijkheid mu’t ok allemoal passen en ens op liek’n, zo as doar an de Stuwe bij Vilsteren bijveurbild. Doar he’w goeie verhaal’n oaver e heurt.
Mooi rivier.
Die kano’s woar’w de Vechte mee of zakt, woll’n wij eigenlijk huur’n bij De Vechtstroom. Maar noe leze wij nog net op tied in Rondom Dalfsen 72 ( complimenten an de redactie, wij kunt niet vaake genog zegg’n, ’t zöt d’r weer prima uut….) dat det noe iniens Mooirivier heet. Woar hef de Vechte det noe weer an te danke’n!?
Det wi’w eerst wel ’s heur’n, woar zo’n naame noe vandan kump. Wij bint d’r hier in’t Noorden al ettelijke keer’n, tut in FNV kringen toe, maar ok op de golfbane, op an e sprökk’n, maar wij moss’n ’t antwoord schuldig bliem’n. Wij bint volledig verrast , maar
op wat sommigen ’t mooiste terras van Nederland nuumt, mu’w doar toch achter kunn’n komm’n. Det kan dus nog’n laatertie wudd’n!
Het zol ons niks verbaaz’n as de joarlijkse bukkumfietstocht ok die kaante op giet. Hoppelijk dan wel mett’n bettie minder geglibber dan veurig joar tussen Reimink en de Boskamp. Onze fietsen hebt d’r nog wel’s oaver!
Veur de rest verwieze wij hier weer graag noar onze vernijde website. Nog mooier, nog duudelijker en veur de liefhebbers: ie kunt noe ok twitteren, @bukkum1. Gewoon www.bukkum.nl , ie kent det wel.
Naamn’s de Noordelijke Bukkums:
Paul Jacobs