Het mut gebeurn det ik in de maond van het dialekt tog un stukkie in mekare mut dreien. Zolange aj nog smeu in de botten bint dan kuj nog van alles uut haaln tog. Ie kunt an allerlei fratsen en apartigheid mee gaon doen, aj mar uut blieft kieken. Veur deit weet ligge ie met oe goeje gedrag in de lappenmand. Doar ligt der al genog en deurum kriej dan ok nog es te weinig aandacht.
Want assie de hele dag met de konte in berre mut lign dan isset wel mooi aj em van oe of kunt zanniken. Mar noe em wat aans, mensen die stik allenig bint umdet ze de partner bint verleurn en derumme kats allenig bint kom te woon, die hebt mangs wel graag meer anloop of gezelligheid int leem. Allenig is ok mar allenig en assie met een ander saam ens nar toe kunt gaon is det tog wel heel aans dan wanneer ie et in oe uppie mun doen. En ik denke det der un bult luu bint die ut van mekare nie weet en asse det wel wissen det ze tog un bult an mekare kon hem..Ik komme deur mien vrijwilligerswerk soms bie mensen oover de vloere en dan heur ik vake det der machtig veule vraog is naor meer anspraak en gezelligheid. Ik komme de mensen helpen in de tuin en alhoewel ik noe nie bepaald een goeje gesprekspartner binne, bint de mensen blij assie mie over de vloere kriegt. Tis un bekend probleem det de oldere mensen te veule alleen blieft zitten. De kinder hebt vake te weinig tied um bie va of moe op visite te gaon en dan kriej dit zo. En ut bint meestal zukke aorige mensen die der alles veur oaver hebt um un bettie gezelligheid te hem int leem. Asse meuluk uut de voeten kunt daor wut de behoefte an gezelligheid niet minder van, mar assie nog oaveral hen kunt gaon dan isset tog mooi assie saam ens hen kunt goan. Ik denke det iedereine mut bedenken hoe zol ikt zelf fin as ikke zoverre binne det niemand met mie mee wul gaon ens naor toe. Luu die dement wurt verget un bonke, mar wiele hoeft die luu tog niet te vergetn? Anders doet wiele net of dementie besmettelluk is. Oldere mensen hebt mangs mooi verhaaln oover vrogger en det is soms mooi um te heuren eb gelieke zeg ik der wel bie het hoeft niet altied oover vrogger te gaon. In disse tied mut iederiene ok an mekare bliem denkn en af en toe veur de gezelligheid tied veur mekare hem.
Dit vind Ton Schriever