Bettus en Wim goat Zuuk’n noar humor in ’t Vechtdal. Een leuke combinatie met heur goeie doel, het Hospice in de Pastorie van Dals’n. Want…

Bettus en Wim goat Zuuk’n noar humor in ’t Vechtdal. Een leuke combinatie met heur goeie doel, het Hospice in de Pastorie van Dals’n. Want “goeie humor hef een lach en een troan”, zeg Bettus Grotenhuus, die lid is van ’t comité van aanbeveling van het Hospice. Wim Hoongkaamp was eerst nie zo gecharmeerd van een anbeveling veur ’t Hospice, hi’j vuult zich doar nog iets te gezond veur.
Toch is ’t er van ekomm’n en zult B&W vrijdag 10 oktober een oamdvullend cabaretprogramma breng’n in De Wiekelaar in Oldluus’n. Zie zult veslag doen van heur zuuktocht. Een paar humoristische figuur’n hebt ze ok evunn’, die bint d’r ok.

En wieders giet ’t oaver ’t Vechtdal van vrogger en now, oaver de politiek en de eing’oardigheed’n van ’t volk hier in ’t Vechtdal en in Oldluus’n in ‘t bizunder. En det bint d’r meer dan d’r in iene oamd past, dus ’t zuuk’n was niet echt muulijk veur Bettus en Wim. Wél ’t uut de kop leer’n zing’n en spöll’n van 13 lieties die ze emaakt hebt oaver oons soort volk.

De hele oamd is in vestoanbaar dialect en ’t veschil met plat zal ok an de orde komm’n. Twee luu die uut ’t onderwies komt, kunt doar ongetwiefeld hele vestandige en onzinnige ding’n oaver zeng’n. Net as oaver hondepoep, buur’ngerucht, katholiek’n en protestant’n, fiets’n oaver ’t pöntie, de camping die oaverstroomt en zo meer. En veur de lui die ’t toch nog nie vestoan kunt, ligt d’r brieffies kloar die dan deur de artiest’n noa afloop behandeld wudt.

D’r kunt 50 man in ’t theaterzaaltie van de Wiekelaar, dus ’t is zaak da’j oe van teveur’n opgeeft a’j d’r hen wult. Det kan op www.zuukn.jimdo.com en ie kunt ok al een kaartie koop’n bi’j Supermarkt Dirk. Kaart’n kost ’n tientie en de winst giet dus noar ’t Hospice.