GRONINGEN – DALFSEN – Bienoa deur e dreiht bij de Veersprong. Ok dit joar hef ’n dillegaassie van de noordelijke bukkums ’n veurofbezuuk e bracht aan het front in Dals’n.
Nou, det hebt ze e weet’n. Eerst al die nije rotonde bij de Veersprong. Van schrik dreihen ze zo maar een rundtie of veere extra. Doarnoa, um weer wat op verhaal te komm’n, wat e drunk’n en e gett’n bij de Brugge. ’n Zeer deskundige gids hef ons vandoar of op’n vreeselijke maniere op sleptouw e nömm’n. Vrogger was e gespecialiseerd in de Prinsenstroate, maar noe e teeg’nwoordig wat meer tied hef, zit ok de rest van’t dörp in zien pakket
Honderduut hef e ons verteld oaver de nije Trefkoele+. Die mos toen nog e oopent wudd’n door Willem Alexander, maar det kon de pret niet drukk’n.
Wij werden van de iene zaal noar de andere met e troont. Het was ons al snel duud’lijk, dat hier niet op een paar centen en een paar centimeter ruumte e kekk’n is.
Oaveral blije en veural ok trotse gezicht’n. En terecht! Zie hebt d’r echt wat moois van e maakt. Met zo’n Trefkoele+ kan de Dalser Gemeenschap weer ’n poosie veuruut.

WATERFRONT

Doarveur ha’w vanof het Terrasse an de Brugge al knap snel in de gaat’n e kreeg’n, dat de bouwbewegingen in die buurte in hoog tempo plaatse vindt.
A’j det vergliekt met eind veurig joar, dan is d’r inderdaad flink of e brökk’n en weer op en an e bouwt. Onherkenbaar op sommige plekk’n , maar het verrassingseffect is niet van de lucht.
Of en toe wat vremd umme e spröng’n met het anpassen van bestoande- en nijbouw, maar zolange het niet echt of is, zu’wt doar nog niet te völle oaver hebb’n.
Op’t internet ha’w alwel zo’n bettie in de gaat’n e kreeg’n da’t Waterfront noe inderdaad wel mooi richting Vechte giet. D’r mut nog heel wat in e vult wudd’n, maar ut begint d’r op te liek’n. Wij bint nog steeds roazn’d benijd hoe’t uuteindelijk zal liek’n.

BOMENDIEK

En noe’w toch op’t olde Bruggenplein stoat, ku’w metiene em’n noar de Rechtersediek kiek’n. Ja zie stoat d’r nog. De bomen dus, aan beide kanten. Maar wat een ophef en kabaal.
Wij hebt ut zelfs op TVOost kunnen zien. Niet dat det völle e hölp’n hef, want zie bint d’r schienbaar nog niet uut. Wij bint veur’nog zo’n mooie rotonde as bij de Veersprong, maar dan iene bij Rechteren. Vandoar kump dan een oftakking deur’t oostelijke Veerland die mett’n tunnel onder de Vechte deur bij de bochte van de Rondweg( met rotonde natuurlijk) weer anslöt. Ku’w van de Rechtersediek een recreatiegebied (skeeleren, koersballen, klootschieten, leren fietsen, legeroefeningen en meer van det moois) maak’n en stoat die markante boom’n ok niet meer in de weg….Ie snapt het al : wij bint gek op rotondes (veural met boom’n d’r op), maar het zal wel niet helemoal in’t plaatie van de Waterfrontplannen passen.
Zo is’t ok ’n wonder dat de bebouwde kom van Dalsen nog steeds gien verkeerslichten hef (“auch keine Druckampel…?” vrög hier iemand). Kan doar ok es an e dacht wudd’n?

Noe alle Noordelijke bukkums an de AOW bint, he’w wat vaker tied um de boel in de Bukkumbuurte en omgeving in de gaten te hoal’n. Jullie bint dus e waarschuwt.
Maar eerst komme wij natuurlijk eind dit joar weer via de Veerlandsprongrotonde in Dalsen en De Trefkoele+ kiek’n of alles weer gewoon zien gangegie giet of dat de nieuwe opzet van De Trefkoele+ veur extra verrassingen zörgt. Veur de liefhebbers schient d’r ok dit joar weer Koersbal e spöllt te wudd’n.
Het kan dus niet op. Wij verheugt ons alvaste op de fietstocht de dag d’r veur. Tut bi’jt station of anders in De Trefkoele+.
Zie verder veural Bukkum.nl veur de meest verse informatie.

Namens de Noordelijke Bukkums,

Paul Jacobs