OOSTERDALSEN – Zo, noe magt dr niemand meer zeggn dat ambtenaarn lui bunt. Heb ik afgeloopn wekke mien plann bekend emak van de diertune, woarvan ik daggen det dat zonder vergunnink kon. Nou vandage waarn dr al twee ambtenaarn van toezicht en handhaving, kiekn of alles wel volgens de reegels giet.

Noe wet iederiene det ik nie zo bange bunne en wel es wat uut probere, dus opt gemeentehuus daggn ze vanmunn, dat Bekedammegie mutte wej ff controleern.

Mar goed, de ambtenaarn waarn tevreen al mut ik eerst op et gemeentehuus een tekening met aantalln diern loatn ziene veur ik dr nog meer kope. Wat ik noe heb ekocht zit mooi veilig in een paar kooin in önze winkel en kreegn het juuste voer, concludeern de beide ambtenaarn.

De geplaatste hekkn waarn iets te hoge mar ik gooi doar wel iets zaand teegn an, dan bunt ze toch vanaf det zaand leager?

Soms muj dr een drei an geem.

Zundag met de poasn open was gin probleem en sie woldn zelfs de burgemeester of wetholder laangs stuurn.

Officiele opening en zo, nö ik dagge det ik bieveurbeeld det deerntie van Warringa mar vroage, ik kenne heur van en moe goed.

Een diertune in Dalfsn was toch wel welkom en een verbreeding van de recreatieve mooglijkheedn veur de toeristn.

Wej mossen ok een decibelmeter koopn want diern die boam een bepaald geluidsnivo kwaam moggen nie veuran de welsummerweg stoan mar achterin bos.

Net of die sjofels en bouwvakkers gin lawaai maakt doar teegnoaver önz!!

Probere die decibelmeter eerst mar es uut bej die bouwvakkers.

Ach mar nie zovulle probleem maakn, schöt nie op. Nou ik mut zo mien babyleeuwgies voern.

Groetn gruune Jopie