OOSTERDALSEN – Alle mensn hartelijk dank veur de onmundig völle positieve reacties. Ik wis dat Dalfsennet populair was mar echt bienö iederiene kek dr wel zo now en dan op. Ik heb zelf genootn van de aandacht en de lach die mensn op hun gezicht kreegn.

Willy bedankt veur ut podium. Eerste paasdag op sundag 1 April en dan stek ie dr iene de gek an. Det mag op denn eersten april natuurluk altied een bettie. Mar twas vant joar wel heel völle.

HH en Willy hebt de aanzet egeem zodet wej vandage um en nöbej de 100 bezoekers hebt ehad veur önze dierntune.

Heel völle fietsers en auto’s reden doarnoast ff  stapvoets langs want nejskierig bunt wej allemoale.

De tijger in önze winkel was mooi tam en rustig vandage. Twee keer hef iemand wat heurn grommn. Mar dat kan ok wat aans ewest wenne. De kinderties konden de tijger aain mar ok önze knienties en cavias anhaaln. De beide ezels, Pierck en Dieksie bulkten zo now en dan ok as ze aandacht wollen.

Mooi daggie, eersten April op eerste Poasdag.

Groetn gruune Jopie

(Zo, noe eerst eem het podium opruum. Red.)