Kold op de grond - Foto: Gruune Jopie
Foto: Gruune Jopie

Kold op de grond

DALSEN – De hele winter fröst nie en noe ist veurjoar en mut nog eem vriezn. Onderweg zaag ik de Leliekweker zien veldn afdekkn met vliesdoek en disse doekn bunt net genög um de tere Lelie’s te beschermn teegn temperatuurn onder nul.

Merkn doej dr nie völle van umdet ut frös as de zunne opkump en de meeste luu hebt de oogn dan nog dichte.

 

As klein jochie warkn ik bej de Tuunders an de Ankummer Es en die haddn met menare de afspraak det dr gin eenjoarige bluumpies verkocht werdn veur 15 Mei. En doar hield iederiene zich netties an. Veur 15 mei könt nog vriezn en deur disse gezamelijke afspraak beschermn disse tuunders de mensn veur schade en broene bluumpies.

 

Mar ja, noe bunt dr allemaoale winkels die ok bluumpies verkoopt, verstand hebt ze dr nie van. Ok de opwarming van de Eerde zal weh metspulln. Ik bun ok van mien geloof af estapt en verkoop rustig bluumpies veur 15 Mei.

 

Vannacht een kraakense nachtvorst en mönn broene bluumpies, te nagedachtenis an de tuunders van de Ankummer Es. Heel geniepig hoppe ik dr weh een bettie op.

 

Groetn Gruune Jopie

 

 

 

Foto 1
Artikel delen: