Ie mutter ma opkom - Foto: Ton S
Foto: Ton S

Ie mutter ma opkom

LEMELERVELD – Mangs muj goed bedenken hoei ut mut doen zo ait ewent bint. Met un handicap leem det is soms un bettie anpassen. Ik kwame wellis bie un man in een rolstoel. Iederiene kan in een rolstoel trechte kom en disse kerl was de beide biene verleuren. Dan kuj gon denken dette ze dan maar weer mut opzeuken, mar det konne nie want die biene waarn der kats of.

Hij had wel un paar proteeses en daor konnie met behulp van krukken un bettie rondloopn. Die kerl had un katte in huus en um det biest te voern, hadde van die conservenblikkies met kattevoer in huus. As die blikkies leug waarn, wolle die bie ut afval doen. De afvalbuul hei dan rap vol met al die blikkies assie ze niet plattrapt. En noe komme wie bie zien probleem. Hij kon die blikkies nie meer plattrappen zonder bienen.

Hij hatter echter wat oppe vun. Hij had nog een auto, die helemaol anne past was veur hem zodette nog kon rieden. Hij had bedacht um dan mar met de autobanden over die blikkies te gon jaagn en zo wurn die blikkies mooi zo plat as un duppie. Op die manier had hij een mooie oplossing bedacht um zien probleem op te lossen. Ai mar un bettie goed naodenkt, kommie der vanzelf achter dei mangs meer kunt dan ai zelf denkt.

Ton

Artikel delen: