LEMELERVELD – Dieren kunt nuttig ween. Ai un katte hebt kan die der veur zurgen dei minder last hebt van moezen. Ie kunt ok gezelligheid dran hem. Ie hebt iets umme oe hen en iets um veur te zurgen. Mar as die katte dan ok over taofel mag loopn giet mie det weer te verre. Ai ant koffie drinken bint an taofel en de katte wul a bienao oen koffie umme reuren det hoeft van mie nie.

Katten mut mangs ok eem nor buutn um de natuur zien gang te laoten gaon. In de tuun kunt ze dan mooi trechte. En buutn in de natuur kump die katte ok andere diern teegn zoas veugelties. As zo’n katte daor dan op giet jaagn, dan is det niet zo raar. Mar assie dan bie iemand bint die graag naor die veugelties kek hoe die rondvliegt en mangs wat gaot vretten biet vogelhuusie, zal die det gejaag van die katte niet echt waardeern. As die persoon die katte dan giet anhaaln en mee naor bin nemt, heffe naost ut gekiek nor de veugelties ok un andere bezigheid: katten aaien.. Mar dan muj katten wel leuk vin en niet allenig mar denken an geweern, buksen of stien um die katten weg te jaagn. Dan kuj de partij veur de dieren um raod vraogn, mar die weet ok niet altied de goeie oplossing. Ie kunt ut mense die graag naor veugelties kiekt wel ut advies geem um aans veugelties bin in un kooigie te nem en dan gin katte derbie. Aans kriej utzelfde gedoe mar noe bin. Iets aans giet over honden. Mangs kommie ens an de deure en dan giet mie toch zo’n hond tekeer. Ik denke dan det die hond zien werk goed dut.
Daorveur hebbie toch un hond um te waken. Vake heur ik dan de baas van die hond teegn die hond te keer gaon det die zien kop mut haoln, mar die hond dut toch allenig mar zien werk goed? Tja van mie mag die hond ok van zich aofpissen umme te laoten weetn detter volk an de deure is.

Ton