LEMELERVELD  – Um in goeie foto bie mien stukkies te kriegn, muj mangs wat uutfigulieren. Dan muj ut doen mer spuln diej daorveur  kunt gebruukn. De foto mut ok nog an beoaalde eisen voldoen, aans ist gin goeie reclame veur Dalfsernet . De foto wurd emaakt mer de telefoon en as det un old apparaat is of zo’n goedkoop geval zitter vake gin al te beste camera op.

Ok bie ut nem van de foto  muj ut apparaat stille haoln, aans kriej allenig mar un prutfoto. Ik had noe un stukkie maakt over vissen en ik dache det un foto van un hengel met un vissteultie derbie wel mooi zol staon. Ik hebbe ooit un paar hengels ehad um met de kinder te gaon vissen en te kieken of ze ut mooi vun.  Die hengels  ston der a jaoren en helaas bint ze niet meer compleet. Ut onderste  stuk stond dur nog en ut boomstuk was pleite.

Zal wel int kanaal liggen.

Dus un dunne piepe deran edaone en met tape  vaste maakt . Noe mos ik nog un vissnoer verzin. Ut sjemtouw was op, dus  hek mar strootouw enum. Ikke op ut kanaal anne loopn en toen iemand mie zo zag loopn met ut vissteultie en de hengel met strootouw kreek de opmerking dek wel un zware vis wol gaon vangn. Twas alllenig mar veur de foto en dan maakt uk niks uut ja.

Ik heb de foto kun maakn en ast nens op slut, dan ist mar zo. Misschien zegt ze wel bie Dalfsernet ok wel det ut met zo’n foto belacheluk wurd.  Ik denke mar: weggooien kan ait nog.

Ton