LEMELERVELD – Ai ewent bint dei ait un bulte op veurraod hebt, hebbie niet zo gauw last dei un keer misgriept. Misgriepn kan ok ens aans an lign. Ie hebt rap un brille neudig of un bettere brille, want ie griept der steeds naost. Ut kan ok ze ween dei te rap bint um iets te pakn of dei oen jatten niet goed meer anstuurt.

An de andere kante kant ok un leermoment ween. Ai un keer misgriept, betekent det ut op is. En ast op is muj eem steurig an doen en niet zo vake meer griepn. Ast over etten giet, dan muj dus minder vretten en det kan dan ok nog goed veur oe ween. Ie kriegt dan niet meer zo’n dikke balg en hoefie ok gin andere kleding umdet ut niet meer past. Zo haol ie geld in de knippe. Ut kan ok zo ween dei iets wult pakn as hulpmiddel en as det dan op kant un leem scheln. Ai spul op veurraod hebt hei ok gin last van hoge priezen as det spul iniens heel veul gevraogd is. Ie hoeft dan ok niet zo vake meer hin en weer te kacheln um ut spul in huus te slepn. Ut gef oe meer rust ai weet dei wat in veurten hebt en de boel zo mooi kunt deurdoen.