Ut kump zo mar op - Foto: Ton S
Foto: Ton S

Ut kump zo mar op

LEMELERVELD – Un mense leert praoten deur wat ze heurt as anderen wat zegt. Ze imiteert watter rond um henne allemaol gebabbelt wurd. Int begin weet ze nog niet alle weurties en aster dan iets beneumd mut wurn verzint ze iets um ut duudeluk te maakn.

 

Un klein deerntie zag un wespe loopn en wol der wat over te weetn kom. Ze vreug of ut biesie ait zwart en geel was en dan umstebeurten. Ze kende ut weurtie gestreept nog niet, mar had ut toch slim verwoord. Deur zukke oplussingen kreg ut praoten meer kans. Ai slecht te verstaon bint, muj mangs rap iets aans verzin wat wel te verstaon is. Hier sprek ik uit eign ervaring. Un kinderbrein hef dan meer oplussing dan ie zoln denkn. Kinder kunt ok meuluk geheimpies bewaarn. Zo was un jochie kwaod op zien moe en toen ze nao ut bosschoopen doen weer thuus kwaam, zeie iniens hardop dette echt niet zol verklapn det ut kadeugie veur pa un paar nieuwe sokken waarn. Ma baalde dat haar geheimpie noe al bekend was ewurn. Want daor deed det jochie ut juust umme. Pa had zo’n kadeugie al eerder ehad en wus zelf ok nie  wat ze hem noe  mossen geem,  mar un paar extra sokn waarn ait welkom.

Un klein meisie vreug zich wat aans aof. As iemand giet lachn bie un  binnenprettie, wat gieter dan gebeurn bie un buutenprettie. Kinder weet mangs nog niet alle weuties, mar kunter ok wat bie maakn. Fantasie is iets moois.

Artikel delen: