LEMELERVELD – Ai is gaot verhuusn, kump ut veur dei drachter komt hoeveule spuln en rommel ie eigenluk hebt. Ai alles mee wult verhuusn, zuj aorig ant slepn kom. Noe hei de kans um  de veuraod spuln uut te gon dun, want ie komt noe ding teegn waorvan ie oe ofvraogt waj dur nog mee mut. Ie kunt gon steln dei ut ait nog weg kunt gooin, mar dan goj allenig mar  rommel verplaatsen en det zol toch zunde van de tied ween.

Oen nieuwe woonplekkie zol dan ok rap vol kom te lign met spuln waorvan ie achterof of gaot vraogn weurumme ie det niet hebt weggegooit. Ai toch eigenwies wult bliem en ut toch mee nemt, muj van narigheid misschien wel  biebouwn um ut spul allemaol te kun bergn. Tis natuurluk wel zo det ut mangs handig is ai wat op veurraod hebt lign, want ai weer mun koopn umdeit neudig hebt kuj oe veur de kop slaon deit weggegooid hebt. En kiek dan is welke tied dur weer giet inzitn ait weer mun ophaaln. Zo heurn ik is over un vent die thuus ant klussen was en rap eem nor de bouwmarkt um spuln op te haaln. Dur stond dus un radarcontrolepost die hem.op hen en truggeweg eknipt had toene veuls te hard dur langsscheurn. Det wun toen un duur thuusklussie. Mar noe weer trugge bie de spuln diej mun uutkiezen wat wel en wat niet mee giet. Hoe meer ruumte ai hebt, hoe meer spuln ai hebt. Ai zo’n bult spuln hebt dei weet dei ut ens hebt, mar ie weet niet waor dan kuj mangs better wat nieuws koopn met tegenzin. Want ut opzeukn zal veuls te lange duurn. Ai det weet van oe zelf, zuj minder meuite hem um iets weg te gooin en krieg ie niet zo gauw ruzie met oezelf.