LEMELERVELD – Iemand die un boom in de veurtuun had staon, wol daor graag vanaof. Dus dur wurn hulpe vraogt daorbie. Dur was wel un kerl diet wel wol doen, mar hij had gien kettenzaage.  Um ut dan met un handzaagie te doen kon natuurluk zat.

Mar weurum zoj oe int zweet marteln ait rapper en makkelukker kunt doen dan muj det niet laotn. De boomeigenares vreug ok nog of de hulpverlener metiene de boom kon aofvoern, want de hele boom pasn niet in de gruune container.

De hulpverlener zol zowiezo de boom niet aofvoern, mar hij wol pribeern um un kettenzaage te regeln en kon dan de boom in stukn zaagn.  Met un geleende kettenzaage kwaamp de hulpverlener bie de boomeigenares.Hij  hef de boom ummezaagt en in stukn zodet ut holt in de gruune container kon. Nao det ut klaor was vreug de boomeigenares of de hulpverlener ok un paar takn van de boom van de buurvrouwe wol zaagn, want die kwaam dichtbie heur boomraam en daor stoorn  zie zich nogal an. De hulpverlener zei det ut dan eest met de buurvrouwe overlegt mos wurn. Dus de buurvrouwe derbie ehaalt en die had heel andere ideeen over het snoeien van heur boom. Toen begon ut bekvechtn en ut leek net zo’n rijdende rechterzaak te wurn. De hulpverlener zei det hij de boom an barrels ezaagt had waore veure kom was en aster meer mos gebeurn, zoln ze met zien beiden eerst der uut mutten kom watter wel en niet mocht. Aans mossen ze meester Frank Visser mar beln die met zien programma: de rijdende rechter  un bult ervaring hef met buurn die van bekvechtn haolt. Misschien kompt ze dan met hun bakkus ok nog op televisie. De buurvrouwe gunk weer nor heur eign huus terugge en de boomeigenares begun toen ok met heur huusgenoot te bekken over de boom van de buurvrouwe. De hulpverlener wol verder niet langer bliem hang um mee te maakn det ut nog meer trammelant zol wurn.  Hij nam de kettenzaage mar gauw weer mee zodet die niet gebruukt zol wurn veur zaakn waore niet veure maakt is.

Ton