LEMELERVELD – Un auro is merakel makkeluk um bosschopn te doen. Ai zelf biet loopn un bettie piene veult kaun auto dan goed te passe kom, ai buutn ut centrum woont. Ie zoln kun denkn det un entie loopn juust goed is veur de soepelheid van de biene. De piene die noe al hebt kan dur ok slimmer van wurn.

Met slimmer bedoel ik hier erger en niet wat aans, want in de biene zit gien hersens. Mar assie noe toch neudig bosschopn mut hem umdet oen visite bienoa alles hef oppevretn. Aster dan weer visite kump, muj wel wat in huus hem um op taofel te kun zetn, aans komt ze nooit weer. Ie hebt un auto bie huus, mar vanwege ut zere bien lek ut oe niet verstandig um te gaon rieden. Stel dej ens teegn anknapt, dan kunt ze oen riebewies aofhaaln. De verzekering zal dan ok zegn det ze daor nooit veur zult betaaln. Dan bej nog verder van huus ( kuj ok gelieke bosschopn doen) en hej nog meer probleemn. Hoe kriek de bosschopn noe bie huus? Ie kunt ze laotn bezorgen, mar eempies van huus weg is ok wel prettig. Ai dan toch wegbent kuj ok gelieke geld gaon pinnen. Un leuge knippe is ok niet handig ai steeds volk bie huus hebt die weer geld van oe wul hem.

Die luu komt oe helpn umdej zelf niet zo goed meer kunt rondklooien. Ie wult toch oen dankbaarheid laotn zien deur iederiene goed te betaaln, zodet ze graag weer komt helpn. As dan iemand met oe mee wul gaon bosschopn haaln en geld pinnen bei daor wel heel blij mee. Ie wult dan ok kaduugies geem daorveur, mar ie mun wel bedenkn det ut ongemakkeluk over kan kom . Ut kan ok gewoon uut naostenloefde edaone wurn en daor stiet niks teegnover.  As de hulpverlener kan bedenken det ut un waarderingsgebaar is, kan dur begrip veur oppebracht wurn. Ai menare zo tevrene haolt,  bij allebeide goed bezig.

Ton