LEMELERVELD – Met al die optochten kujt haost niet meer missen. Ut carnaval is weer bezig. Hele koppels mensn bint al tieden bezig biet ut bouwn van waagns veur de optocht. Bie dreug weer woln veule mensn ut ok gaon bekiekn. Deur de hoogte van de waagns kujt de groepn mangs meuluk un goede schuure vin, waor de waagn dan oppebouwt kan wurn.

Soms bint de waagns zo hoge det ze ut hoge spul dur buutn pas kunt op zetn. Iederiene wul wel metdoen met ut carnaval viern. Mar niet iederiene kan alles waj ziet biet carnaval ok verdraagn. Un groep gehandicapten wol ok saamn carnaval viern, mar dan un bettie angepast. Dus gien flikkerende lampen of keiharde muziek. In un zaaltie bie un bar wurn det feessie haoln. Un bonke confettie, waor volop mee egooit wurn. Um daor te komn mossen rolstoelbusn en stuk of wat autoos in un stoet nor ut zaaltie toe.

De groep mos ok un bettie oppe tooit wurn, veur hoeverre ze det woln. Ok de begeleiders mossen met doen in de sfeer.  De raod van elf waster ok bie en ut wurn al met al un mooi feessie.

Ton