LEMELERVELD – Ie mun ait veurkomn dei in de geute trechte komt. Assie der al in zit, muj zien dei der rap weer uutkomt. Of ut mut oe zo goed bevaln, dei der nog wel un poosie in wult bliem. Ie heurter gien al te beste verhaaln over. Ie kunt wel zo merakel veule pech hem det oe niks meer lukt.

Dan kommie ok nog van die etterbakn teegn, die oe helemaol de verkeerde kante op helpt. Ai dan ok kats gien zinne meer hebt um ut weer goed te bliem doen, kuj gaon denkn det oe allemaol gien bal meer intereseert en mut mar bliem zoast an kump weien. Mar dur bint ok nog andere geuten.

Ai un groot terrein hebt en tis bienao allemaol straote, umdei niet mee hebt edaone ant tegelwipn, kant ween dei bie un bulte reegn ut water ens hen mut. Deurum binter van die geuten waor ut water inlup en zo via piepn ens aans henlup. As die geute niet al te best meer ut water lut wegloopn, dan muj toch is gaon kiekn hoe det dan kump. Un bonke zand of andere pruttel in de geute kant wegloopn vant water meuluk maakn. Dan muj met un schuppe die zooi weghaaln. Noe veurkommie det de afvoerpiepn ok nog verstopt raakt. Ai denkt det met de reegn wel zol meevaln, kant mar zo gebeurn dei un stortbuie kriegt en dan kriej overal grote plasn water, waor ie niet blij mee zult ween. Det kuj better veur ween en eem zurgen det de geutn weer zien werk kunt doen. Noe kommie ok in de geute mar met een heel ander doel.