LEMELERVELD – Un mense hef op un camping un huussie waor ut noe tied veur is un de bende um ut huussie an kaante te maakn. Ai det niet doet kriej gedoe met de andere mensen die daor umme oe hen woont. As det dan gebeurt is, kuj der zo weer hen aj dan un poossie daor wilt bliem. Aster weer netties bie lig, zult de buurn oe mangs ok op de koffie vraogn en hoedt ze niet te foetern det un machtige zooi is bie oen huussie. Dus tis aorig goed bekeekn dei de zooi opperuumt hebt.
De camping lig ant water en ut mense hef zelf un beutie waor zie mee kan gon vaarn asse daor zinne an hef.
Umdet ut mense daor a jaorn kump, hef ze ok kundigheid an andere campingbezuukers. Allicht goj ok wellis met die luu an de praot ai ze al un tietie kent. Ie weet dan ok det de buurn zelfs un paar beuties hebt mar dur barre weinig mee doet. Det kump umdet ze net as heur zelf al aorig older bint. Hun zeilbeutie wult ze noe ok nog verkoopn.
Die stiet al op un trailer zo dette meteene mettenum kan wurn. Ut mense hef un hulpie mee enum en as die wul helpn umme de trailer an de auto te haokn wurd det erg waardeert. Bie ut praotie met de buurn hebt ze ut ok over un older stellegie die hun huussie, det kurt bie hun stond, esloopt hebt. Umdet hun van menare weet hoet toegiet int leem, weet ze van ut stel vant gesloopte huussie helemaol niks. Det is toch un bettie raar. Ze hebt al un beste tied kennis an menare al is det dan alleen op de camping. Mar hun hebt toch ok via whatsapp contact en weet dan ok hoet giet int leem. Noe ze ut daor over hebt, weeter iene te verteln detter ok un vrouwe kats allenig in un caravan woont.
Det is niet zo raar, mar zie hef gien riebewies en ok gien telefoon. Tja ai van rust haolt dan kriej det dan wel natuurluk. De buurties laot weetn det ze de volgende keer as ut mense dur weer is, de koffie klaor zol staon. Noe haan ze koffie wuln maakn, mar ut mense had zelf a koffie maakt, want heur hulpe begon al um koffie te zeurn toene de boel opperuumt had. Ut mense mos allenig heur beutie nog biet huussie laotn kom vanuut de winteropslag. Dan kont vakantieviern veur heur begin.
Ton
Foto pixybay