LEMELERVELD – Assiee un lappe grond hebt en daor kunt de peerden de boel mooi glad haoln, dan muj dur wel veur zurgn det ut draod derum henne wel goed is. Aans lup oet spul gelieke weer lus en kuj dur weer achteran. Noe lig det stuk grusland niet dierekt in de buurte van autoweegn, want det zol dan gevaarluk wurn.
Umme ut laant stiet un bult bos en asse daor dan in komt teloopn, kuj meuite kriegn aj ze dair weer in mut opzeukn. Ze kunt zich achter de boomn gaon verstopn. Tja die peerdn wult ok wel is un spellegie doen.
De peerden loopt bie un manege en daor hebt ze de boel al aorig glad. Um ze noe in un bettie vers grus te jaagn,zol dan welkom ween. Noe muj dus ut grusland rond sjouwn umme te kiekn of ut draod en de paoln nog heel bint. Eerst kiekn waj allemaol neudig hebt en deurumme jaagie met un auto langs ut draod umme det te bekiekn. Dan kuj ut spul inlaadn en kuj begin um waor neudig ut draod te repareern. Un bulte paoln bint a neudig, want die dur staot bint kats offerot. Noe zitter zelf twee draoden umme ut land en veur peerden is der heel niet neudig. Duronder deur kroepn zult de peerden niet gauw doen en asse dur overhen wult gaon nemt ze det onderste draod ok zo mee. Prikkeldraod bie peerden is zowiezo niet zo handig, want dan kunt de peerden zich ok nog luluk an bezeern. Ut mooiste zol un lint ween met stroom durop, marja asse noe int land blieft is det un stuk makkelukker.
Ik denke asse mar genog te vretten hebt int land, hebt ze buutn ut land ok niks te zuukn.
Ton