LEMELERVELD – Un keerl giet mangs uut werkn en dan gebeurt wellis dette machtig gasterig kan wurn. Asse dan un overal an hef ist niet zo’n ramp. Gewoonluk heffe onder die overal ok nog andere kleern an. Dan kanne de overal uut doen en zalle de boel niet besmeern met zien gasterige kleern. Zien vrouwe kent hem al un bettie en die mag dan ait de pruttel weer opruumn die den keerl dur vanne maakt hef.

Dus as die vrouwe hem thuus zut kom met die gasterigge kleern, kreg den keerl metiene de opdracht umme de kleern uut te doen in de garage of nog better buutn en in de onderbokse nor boom veur de douche. Doar magge zich dan wasn en umme kleedn, veurdette in de rest vant huus mag rondstruin. De vrouwe hefter schone genog van umme ait mar weer de troep achter zien konte op te ruum.  Asse dan buutn zien kleern veur de deure al mut uutdoen, hebt de buurn ok nog wat te zien. Die kriegter gelieke al rare gedachtes bie en det is dan weer mooi veur de buurtpraot.

Ton